قازاقستانعا ورالعان قانداستاردىڭ ەڭبەك ءوتىلى زەينەتكەرلىككە شىققاندا ەسەپتەلە مە؟
بۇل تۋرالى بۇگىن حالىقپەن ەسەپتىك كەزدەسۋ وتكىزگەن ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.
كەزدەسۋ بارىسىندا تاناگۇل احمەتوۆانىڭ ينتەرنەت-فورۋم ارقىلى مينيسترگە جولداعان ساۋالى وقىلعان بولاتىن.
ساۋالدا: «باسقا ەلدەن كوشىپ كەلگەن قازاقتارعا زەينەتاقى تاعايىندالعان كەزدە ولاردىڭ بۇرىن تۇرعان ەلدەرىندەگى ەڭبەك وتىلدەرى ەسكەرىلە مە؟ مەنى قىزىقتىراتىنى موڭعوليادان كەلگەن ازاماتتار، ولار زەينەتاقى الۋدا شەكتەۋگە ۇشىراماي ما؟»، - دەلىنگەن.
وسى سۇراققا جاۋاپ بەرگەن ءمينيستردىڭ ايتۋىنشا، بۇرىن موڭعوليا، قىتاي مەملەكەتتەرىمەن قازاقستاننىڭ اراسىندا الەۋمەتتىك تولەمدەر، ەڭبەك وتىلدەرى جونىندە كەلىسىمشارت بولماعان.
«سونىڭ سالدارىنان ول كىسىلەردىڭ، ماسەلەن موڭعوليادا جۇمىس ىستەگەن وتىلدەرى ەسەپتەلىنبەيتىن. قازىر ونداي كەلىسىمشارت بار. سوندىقتان موڭعوليادان دا، قىتايدان دا كەلگەن قانداستارىمىزدىڭ سول جاقتاعى ەڭبەك وتىلدەرى ەسەپتەلىنەدى. ءبىزدىڭ قازاقستاندىق زەينەتكەرلەر سياقتى ول كىسىلەر دە زەينەتاقى الادى»، - دەدى ب. ساپاربايەۆ.