12:54, 24 - ماۋسىم 2019 | GMT +6
توقايەۆ ارىستاعى وق-ءدارى قويماسىنداعى جارىلىس زارداپتارىن جويۋدى تاپسىردى
نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆ ءتيىستى ورگاندارعا ارىستاعى اسكەري بولىمىندەگى وق-ءدارى قويماسىندا بولعان جارىلىستىڭ زارداپتارىن جويۋ تۋرالى تاپسىرما بەردى، دەپ حابارلايدى قازاقپارات.
«قورعانىس، ىشكى ىستەر مينيسترلەرىنە جانە تۇركىستان وبلىسىنىڭ اكىمىنە ارىس ق. اسكەري بولىمىندەگى وق-ءدارى قويماسىندا بولعان جارىلىستىڭ زارداپتارىن جويۋ جونىندە شۇعىل شارالار قابىلداۋدى تاپسىردىم. تۇرعىنداردىڭ قاۋىپسىزدىگىن قامتاماسىز ەتىپ، جارىلىستىڭ سەبەپتەرىن انىقتاۋ قاجەت»، - دەپ جازادى پرەزيدەنت ءوزىنىڭ twitter پاراقشاسىندا.
ەسكە سالساق، ارىس قالاسىنداعى اسكەري ءبولىمنىڭ قويماسىندا جارىلىس بولعاندىعى تۋرالى حابارلاعان بولاتىنبىز. ق ر قورعانىس مينيسترلىگى ارىستاعى جارىلىستان زارداپ شەككەندەر جوق ەكەندىگىن جاريالادى.