داۋرەن ابايەۆ الەۋمەتتىك جەلىنى كەرى بايلانىس ءۇشىن قولدانۋ ەرەكشەلىكتەرىن اتادى

نۇر-سۇلتان. قازاقپارات - بۇگىن ەلوردادا جەرگىلىكتى اتقارۋشى ورگاندار قىزمەتىنىڭ اشىقتىعىن قامتاماسىز ەتۋ ماسەلەلەرىنە ارنالعان رەسپۋبليكالىق سەمينار-كەڭەس باستالدى، دەپ حابارلايدى قازاقپارات ءتىلشىسى.

«بۇگىنگى كەڭەس مەملەكەتتىك ورگانداردىڭ اشىقتىعى جانە بيلىك پەن قوعام اراسىنداعى ديالوگتى نىعايتۋ تاقىرىبىنا ارنالعان. ەلىمىزدىڭ تۇڭعىش پرەزيدەنتى حالىقپەن كەرى بايلانىستا بولۋدىڭ جاڭا فورماتتارىن ىزدەۋدى تاپسىرعان بولاتىن. دەگەنمەن، تاجىريبە كورسەتىپ وتىرعانداي، جاڭا تەتىكتەردى ازىرلەۋدىڭ تيىمدىلىگى بۇل جۇمىسقا بارىنشا بىلىكتى ساراپشىلاردى، ازاماتتىق قوعام مەن بۇقارالىق اقپارات قۇرالدارى وكىلدەرىنىڭ بىردەي تىكەلەي قاتىسۋىنا بايلانىستى»، - دەدى ق ر اقپارات جانە قوعامدىق دامۋ ءمينيسترى داۋرەن ابايەۆ.

وسى رەتتە مينيستر ەلىمىزدىڭ قانداي وڭىرلەرى حالىقپەن كەرى بايلانىستى جاقسارتۋ ماقساتىندا الەۋمەتتىك جەلىنى قولداناتىندىعىن ايتتى.

«بارىنشا قامتۋ، اشىقتىق جانە جەدەل ارەكەت ەتۋ - بۇل ءبىزدىڭ باعدارلاناتىن ءۇش پوستۋلات. بۇعان قوسا، قازىرگى ۋاقىتتا وڭىرلەردە ايتارلىقتاي پوزيتيۆتى تاجىربيە قالىپتاسقان. بۇل ەڭ الدىمەن «Open akimat»، «حالىقتىق باقىلاۋ» سىندى جوبالار. مۇنىڭ بارلىعى حالىقتى جاپپاي گادجيتتەۋ، ءبىزدىڭ ءومىرىمىزدىڭ بارلىق سالاسىنا ينتەرنەتتىڭ، سيفرلاندىرۋدىڭ جاپپاي ەنۋىنىڭ ناتيجەسىندە ورىن الىپ وتىر. كوپشىلىك قازىردىڭ وزىندە بولىپ جاتقان وزگەرىستەردى بايقاماۋى دا مۇمكىن. قازىرگى ۋاقىتتا ءاربىر وبلىس اكىمدىگىنىڭ الەۋمەتتىك جەلىدەگى اككاۋنتى بار جانە وعان ادامدار وتىنىشتەرى، شاعىمدارىن، ۇسىنىستارىن قالدىرادى. ارينە، وڭىرلەردە جەدەل ءارى ءتيىمدى ءۇن قاتۋدا ايىرماشىلىق بار. دەگەنمەن، بارلىق ءوڭىر بۇل جۇمىستىڭ ماڭىزدىلىعىن تۇسىنەدى جانە ونى جاقسارتۋعا تىرىسادى»، - دەدى مينيستر.