زەرتتەۋ: تابيعات اياسىندا وتكىزگەن ەكى ساعات دەنساۋلىققا پايدالى
مامانداردىڭ ايتۋىنشا، اپتاسىنا ءبىر رەت ەكى ساعات تابيعات اياسىندا ۋاقىت وتكىزۋ دەنساۋلىققا پايدالى، دەپ جازادى The Guardian باسىلىمى.
«ساياباقتا، ورماندا نەمەسە جاعاجايدا ۋاقىت وتكىزۋدىڭ دەنساۋلىققا پايدالى ەكەنى بۇرىننان بەلگىلى. دەگەنمەن، عالىمدار جۇرگىزگەن جاڭا زەرتتەۋ العاش رەت تابيعات اياسىندا قانشا ۋاقىت وتكىزۋدىڭ پايدالى ەكەنىن انىقتادى»، دەپ جازادى باسىلىم.
اۆتوردىڭ ايتۋىنشا، تابيعاتتا وتكىزگەن ەكى ساعات بەس كۇن قاتارىنان جەمىس-جيدەك جەۋمەن نەمەسە اپتاسىنا 150 مينۋت فيزيكالىق جاتتىعۋ جاساۋمەن پارا-پار.
«زەرتتەۋگە انگليادان 20 مىڭ ادام قاتىستى. زەرتتەۋدى ەكسەتەر ۋنيۆەرسيتەتى مەديتسينا مەكتەبىنىڭ ماماندارى جۇرگىزدى»، دەپ جازادى اۆتور.
ونىڭ ايتۋىنشا، ەكى ساعات تابيعات اياسىندا ۋاقىت وتكىزۋ جاستار ءۇشىن دە، قارتتار ءۇشىن دە بىردەي پايدالى بولىپ شىققان.
«عالىمداردىڭ ايتۋىنشا، تابيعات اياسىندا ۋاقىت وتكىزۋ بارلىق ادام ءۇشىن پايدالى. سونداي-اق ەكى ساعات ۋاقىت ءبىر كۇندە وتكىزۋگە نەمەسە ونى بىرنەشە بولىكتەرگە ءبولىپ تابيعات اياسىندا وتكىزۋگە بولادى. سونىمەن قاتار عالىمدار تابيعاتتىڭ دەنساۋلىققا ناقتى قالاي اسەر ەتەتىنىن انىقتامادى»، دەپ جازادى باسىلىم.