بۇگىن - حالىقارالىق وليمپيادا كۇنى

نۇر-سۇلتان. قازاقپارات - بۇگىن - حالىقارالىق وليمپيادا كۇنى. بۇل اتاۋلى كۇن قازىرگى وليمپيادالىق قوزعالىستىڭ باسشى ورگانى - حالىقارالىق وليمپيادالىق كوميتەتتىڭ قۇرىلعان كۇنى قۇرمەتىنە اتالىپ وتەدى، دەپ حابارلايدى قازاقپارات.

حالىقارالىق وليمپيادا كوميتەتى 1948-جىلى سانكت-موريتسەدە وتكەن ح و ك- تىڭ 42-سەسسياسىندا 23- ماۋسىمدا حالىقارالىق وليمپيادا كۇنىن وتكىزۋ تۋرالى شەشىم قابىلدادى.

بۇل كۇننىڭ تاڭدالۋى دا بەكەر ەمەس. 1894-جىلدىڭ 23- ماۋسىمىندا ح و ك قۇرىلعان بولاتىن.

ءدال سول كۇنى وليمپيادالىق قوزعالىستىڭ نەگىزىن سالۋشى، بارون پەر دە كۋبەرتەن حالىقارالىق اتلەتيكالىق كونگرەسس الدىندا تاريحي بايانداما جاساپ، جينالعان قاۋىمدى وليمپيادالىق ويىنداردى ۇيىمداستىرۋدىڭ نەگىزدەرىمەن تانىستىرادى.

كونگرەسس ءتورت جىل سايىن «ءتۇرلى حالىق وكىلدەرىنىڭ اراسىندا جارىس ويىندارىن وتكىزۋ ءۇشىن»، ەجەلگى گرەكيالىق وليمپيادا ويىندارىن جانداندىرۋ تۋرالى كۋبەرتەننىڭ ۇسىنىسىن ماقۇلدايدى.

ءدال سول جولى حالىقارالىق وليمپيادالىق كوميتەت قۇرىلىپ، باس حاتشىلىعىننا پەر دە كۋبەرتەن سايلانادى جانە 1896-جىلى 1- وليمپيادالىق ويىندارىن گرەكيادا وتكىزۋ تۋرالى شەشىم قابىلدانادى.

مىنە، بۇل ايتۋلى داتا قازىر الەمدە حالىقارالىق وليمپيادا كۇنى رەتىندە كەڭىنەن اتالىپ وتەدى. ءبىزدىڭ ەلىمىز اتالعان مەرەكەنى بيىل 26-رەت اتاپ ءوتىپ جاتىر.

اۆتور: كۇنسۇلتان وتارباي