اقتوبەدە قولا داۋىرىنە جاتاتىن قورىم زەرتتەلىپ جاتىر

اقتوبە. قازاقپارات - اقتوبەنىڭ ويىل اۋدانىندا زەرتتەۋ جۇمىسى باستالدى. ارحەولوگتار جەرلەۋ راسىمىنەن سولتۇستىك كاۆكاز جانە مەسوپوتاميا وركەنيەتىنە ۇقساستىق تاپتى، دەپ حابارلايدى قازاقپارات ءتىلشىسى.

كوكتەم كەلە ارحەولوگتار زەرتتەۋ جۇمىسىن باستادى. ويىل اۋدانى، قۇمساي ياعني، قىرىقوبا قورىمىندا بيىل جەتىنشى جىل قازبا جۇمىسى جۇرگىزىلىپ كەلەدى.

قازبا جۇمىستارىنا اقتوبە وبلىستىق تاريحي-ولكەتانۋ مۋزەيىنىڭ ماماندارى، ارحەولوگتار، تاريحي-مادەني مۇرانى زەرتتەۋ، قالپىنا كەلتىرۋ جانە قورعاۋ ورتالىعىنىڭ قىزمەتكەرلەرى، ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ تاريح فاكۋلتەتىنىڭ وقىتۋشىلارى مەن ستۋدەنتتەرى قاتىسىپ جاتىر.

«قورىمدا تابىلعان دۇنيەلەر ءارتۇرلى جەرلەۋ راسىمدەرىنەن ماعلۇمات بەرەدى. ول ۋاقىتتا ءومىر سۇرگەن ادامداردىڭ نانىم-سەنىمدەرىنە بايلانىستى قىزىل بوياۋدى كوپ پايدالانعانى كورىنىپ تۇر. ءسابي قالپىمەن جەرلەگەندەر دە كەزدەستى. كەيبىرىنەن كىشكەنتاي بالانىڭ سۇيەگى مەن تاسباقانىڭ ساۋىتى بىرگە تابىلدى. ادامداردى شالقايتىپ، وتىرعىزىپ جەرلەگەن. قولا داۋىرىنە جاتاتىن بۇل قورىم قازاقستان بويىنشا وتە سيرەك كەزدەسەدى. ادامداردىڭ جەرلەۋ داستۇرىنە ساراپتاما جۇمىستارىن جۇرگىزگەننەن كەيىن بۇل اۋماققا جەرگىلىكتى حالىق ەمەس، باسقا جاقتان كەلگەن تايپالار جەرلەنگەنىن انىقتادىق. جەرلەۋ داستۇرىنە قاراساق سولتۇستىك كاۆكاز جانە مەسوپوتاميا وركەنيەتىنە ۇقساستىق بار. بولجام بويىنشا، العاشقى باقتاشىلاردىڭ دا قورىمى بولۋى مۇمكىن. مۇنداي اۋماق قوبدا، تەمىر اۋدانىندا بار دەپ ەستىدىك، ءبىراق وعان ءالى ءوزىمىز بارا قويعان جوقپىز. ازىرگە وسى سەگىزساي مەن قۇمساي ايماعى زەرتتەلۋدە. ايتا كەتەتىن جايت، قازىرگى كەزدە ويىلداعى قاراتال، قۇمجارعان، قوڭىرات جانە تاعى باسقا اۋماقتاردا 400 گە جۋىق ەسكەرتكىش انىقتالدى. اسىرەسە كوپتوعاي اۋىلى ماڭىنداعى ۆەنگرلەرگە ءتان ەسكەرتكىشتەر بىزدەردى قىزىقتىرىپ وتىر»، - دەيدى تاريحي-مادەني مۇرانى زەرتتەۋ، قالپىنا كەلتىرۋ جانە قورعاۋ ورتالىعىنىڭ ديرەكتورى اسلان مامەدوۆ.

اقتوبە وبلىستىق تاريحي-ولكەتانۋ مۋزەيىنىڭ باسپا ءسوز قىزمەتكەرى قۋات ءابىلقايىردىڭ ايتۋىنشا، ويىلدان 11 شاقىرىم قاشىقتاعى قۇمسايدىڭ توپىراعى قۇرىلىسقا جارامدى. سوندىقتان اۋىل تۇرعىندارى قورىمدى بۇزباس ءۇشىن زەرتتەۋ جۇمىستارى باستالعان كەزدە تاريحي-مادەني مۇرانى زەرتتەۋ، قالپىنا كەلتىرۋ جانە قورعاۋ ورتالىعىنىڭ ماماندارى ەسكەرتۋ تاقتاسىن ورناتتى.