گرۋزيا اۋە جەلىلەرىنىڭ رەسەي اۋماعىنا ۇشۋىنا تىيىم سالىندى
بۇل جونىندە ر ف كولىك مينيسترلىگىنىڭ مالىمدەمەسىندە ايتىلعان، دەپ حابارلايدى قازاقپارات ت ا سس اگەنتتىگىنە سىلتەمە جاساپ.
كولىك مينيسترلىگىنىڭ سايتىندا جازىلعانداي، اۋە قاتىناسىنىڭ توقتاۋىنا ءتيىستى اۋە قاۋىپسىزدىگىن قامتاماسىز ەتۋ قاجەتتىگى جانە «اۋە قوزعالىسىن ۇيىمداستىرۋ جونىندەگى مەمكورپوراتسيا» ف م ۋ ك الدىنداعى اەروناۆيگاتسيالىق قىزمەت ءۇشىن قارىزدىڭ قوردالانۋى سەبەپ بولعان.
گرۋزيانىڭ اەروناۆيگاتسيالىق قىزمەت ءۇشىن قارىزىنىڭ جالپى سوماسى - $793 مىڭ شاماسىندا. تاعى 592,2 مىڭ رۋبل 2008-جىلدان بەرى تولەنبەگەن.
«بۇل تىيىم «Georgian Airways جانە MyWay Airlines كومپانيالارى اۋە قاۋىپسىزدىگى باعدارلاماسىن، اۋديتىن ۇسىنىپ، رەسەي تاراپى كەلىسىم بەرگەنگە دەيىن سوزىلادى. سونداي-اق، گرۋزيا تاراپى اەروناۆيگاتسيالىق قىزمەت كورسەتۋگە قارىزىن تولىق تولەۋى ءتيىس»، - دەلىنگەن حابارلامادا.
سونىمەن بىرگە، كولىك مينيسترلىگى ر ف اۋە بيلىگىنىڭ گرۋزيندىك ارىپتەستەرىنە كونسۋلتاتسيا وتكىزۋگە دايىن ەكەنىن دە ءمالىم ەتتى. ەستەرىڭىزگە سالا كەتەيىك، جۇما كۇنى ر ف پرەزيدەنتى ۆلاديمير پۋتين جۇما كۇنى گرۋزياعا جولاۋشى تاسىمالدايتىن اۋە قاتىناسىنا ۋاقىتشا تىيىم سالاتىن جارلىققا قول قويعان بولاتىن. تىيىم 8- شىلدەدەن باستاپ كۇشىنە ەنەدى.
ەسكە سالامىز، 20- ماۋسىم، بەيسەنبى كۇنى تبيليسيدە جاپپاي نارازىلىق شاراسى باستالدى. كوتەرىلىسشىلەر رەسەي دەلەگاتسياسىنىڭ پراۆوسلاۆيە پارلامەنتارالىق باس اسسامبلەياسىنا قاتىسۋىنا نارازىلىق بىلدىرگەن.