اقاۋ شىققان «ەير-استانا» ۇشاعى شىمكەنت اۋەجايىنا قونۋعا ءماجبۇر بولدى

نۇر-سۇلتان. قازاقپارات - «تاشكەنت-الماتى» باعىتىنداعى رەيستى ورىنداپ كەلە جاتقان «ەير- استانا» اۋە كومپانياسىنىڭ ۇشاعى قىمتاۋ جۇيەسىندەگى اقاۋعا بايلانىستى شىمكەنتكە اپاتتى جاعدايدا قوندى، دەپ حابارلايدى قازاقپارات كومپانياعا سىلتەمە جاساپ.

«ەير-استانا» اۋە كومپانياسىنىڭ مالىمەتتەرى بويىنشا، 22- ماۋسىم كۇنى «تاشكەنت-الماتى» باعىتىمەن ۇشىپ بارا جاتقان ك س 128 رەيسى قىمتاۋ جۇيەسىندە اقاۋدىڭ پايدا بولۋىنا بايلانىستى الماتى ۋاقىتى بويىنشا 16 ساعات 15 مينۋتتا شىمكەنت اۋەجايىنا شتاتتى جاعدايدا قوندى. زارداپ شەككەندەر جوق»، - دەلىنگەن حابارلامادا.

ۇشاق ەكيپاجى قونۋ تۋرالى شەشىمدى قاۋىپسىزدىك تالاپتارىنا بايلانىستى قابىلداعان. قازىرگى تاڭدا ۇشاقتىڭ اقاۋىن ىزدەپ تاۋىپ، ونى جوندەۋ جۇمىستارى ءجۇرىپ جاتىر. جولاۋشىلاردى ساعات 22:40 تا «شىمكەنت-الماتى» تۇراقتى رەيسىمەن الىپ كەتەدى.