ساقتاردىڭ كوشباسشىسى - توميريس تۋرالى فيلم قاشان پروكاتقا شىعاتىنى بەلگىلى بولدى

نۇر- سۇلتان. قازاقپارات - مادەنيەت جانە سپورت ءمينيسترى اقتوتى رايىمقۇلوۆا «توميريس» فيلمى قاشان پروكاتقا شىعاتىنىن ايتتى، دەپ حابارلايدى قازاقپارات ءتىلشىسى.

«جىلدىڭ اياعىنا دەيىن (قازان ايى- اۆت. ) اقان ساتايەۆتىڭ «توميريس» تاريحي كارتيناسى پروكاتقا شىعادى»، - دەدى مينيستر حالىقپەن ەسەپتىك كەزدەسۋىندە.

ا. رايىمقۇلوۆانىڭ ايتۋىنشا، قازاقستاندىق- رەسەيلىك «ەۆاكۋتسيا» فيلمى جاقىن ارادا كوپشىلىككە كورسەتىلمەك. مۇنىمەن قوسا، قازاقستان مەن رەسەي ارنايى قىزمەتتەرىنىڭ جۇمىسى تۋرالى ا. سوكولوۆتىڭ «ۆيجيۆشايا» جوباسى پىسىقتالۋدا.

بەلگىلى بولعانداي، وتكەن عاسىرداعى 40-50- جىلدارداعى وقيعالار تۋرالى بىرلەسكەن كينوجوبانى قۇرۋ بويىنشا «Plano a Plano» مادريدتىك كومپانياسىمەن شىعارماشىلىق جۇمىستار جۇرگىزىلۋدە.

سونىمەن قاتار، ۆەدومستۆو باسشىسى ءساۋىر ايىندا مينيسترلىك «قازاقستان» ورتالىق كينوكونسەرت زالىندا بالالار اۋديتورياسى ءۇشىن «كۇلتەگىن» انيماتسيالىق فيلمىنىڭ العاشقى قايىرىمدىلىق كورسەتىلىمىن ۇيىمداستىرعانىن ەسكە سالدى. 10 مىڭنان اسا بالا، سونىڭ ىشىندە تۇرمىسى تومەن وتباسىلار مەن بالالار ۇيلەرىنىڭ تاربيەلەنۋشىلەرى قاتىستى. ودان كەيىن رەسپۋبليكانىڭ بارلىق وڭىرلەرىندە تۇساۋكەسەرلەر وتكىزىلدى. سونداي- اق، «مۇزبالاق» ، «كەرەي مەن جانىبەك»، «كۇلتەگىن» كارتينالارىنىڭ تەگىن كورسەتىلۋى ۇيىمداستىرىلدى.

«نۇرگەلدى سادىعۇلوۆتىڭ اتى اڭىزعا اينالعان پالۋان تۋرالى «بالۋان شولاق» فيلمىنىڭ پرەمەراسىن كورەرمەن ۇلكەن ىقىلاسپەن قابىلدادى. مامىردا جەڭىس كۇنىن مەرەكەلەۋ اياسىندا قارۋلى كۇشتەردىڭ اسكەري- تاريحي مۋزەيىندە قورعانىس مينيسترلىگىنىڭ، ارداگەرلەر مەن قوعام قايراتكەرلەرىنىڭ قاتىسۋىمەن قارا مايور بوريس كەرىمبايەۆ تۋرالى «جيزن سپەتسيالنوگو نازناچەنيا» دەرەكتى فيلمىنىڭ پرەمەراسى ءوتتى»، - دەدى مينيستر.

ايتا كەتەيىك، اقان ساتايەۆ ساقتاردىڭ كوشباسشىسى - توميريس تۋرالى تاريحي فيلم ءتۇسىرىپ جاتقانى حابارلانعان ەدى. بۇعان دەيىن ءبىز «قازاقفيلمدە» توميريس پاتشايىمدى تاڭداۋ قالاي ءجۇرىپ جاتقاندىعى تۋرالى تولىق اقپارات بەرگەن بولاتىنبىز.

اۆتور: رۋسلان عابباسوۆ