پويىزدىڭ جۇك سورەلەرىنە جولاۋشى جاتقىزعان جولسەرىكتەر قاتاڭ جازالاناتىن بولدى

نۇر-سۇلتان. قازاقپارات - «جولاۋشىلار تاسىمالى» ا ق الەۋمەتتىك جەلىدە تاراعان اتىشۋلى ۆيدەوعا قاتىستى پىكىر ءبىلدىردى، دەپ حابارلايدى قازاقپارات.

كومپانيانىڭ باسپا ءسوز قىزمەتىنىڭ حابارلاۋىنشا، بەينەجازبادا كورسەتىلگەن تامبۋر مەن جۇك سورەسىنە جولاۋشىلار «ماڭعىشلاق - اقتوبە» باعىتىنداعى №309/310 جولاۋشىلار پويىزىندا بولعان. اتالعان فاكت بويىنشا، قىزمەتتىك تەكسەرۋ جۇرگىزىلىپ، ايىپتى قىزمەتكەرلەرمەن ەڭبەك شارتىن بۇزۋعا دەيىنگى اكىمشىلىك شارالار قابىلدانادى.

«بۇل وقيعانىڭ ءبىزدىڭ پويىزدا بولعانى راستالدى، ەندى ەڭبەك كودەكسىنە سايكەس تەكسەرۋ جۇرگىزىلەدى. مۇنداي ۆيدەولار كومپانيانىڭ باس ديرەكتورىنىڭ بلوگىنا كەلىپ تۇسەدى جانە ءبىز ايىپتى قىزمەتكەرلەرگە ەڭ قاتال جازانى قولدانامىز. وتكەن جىلدىڭ ءساۋىر ايىندا كومپانيادا زاڭسىز جولاۋشىلار مەن جۇك تاسىمالدايتىن قىزمەتكەرلەرگە «توزبەۋشىلىك» ۇستانىمى ەنگىزىلدى. بۇل ارالىقتا 130 ادام جۇمىستان شىعارىلىپ، 26 ادامنىڭ لاۋازىمى تومەندەدى»، - دەدى «جولاۋشىلار تاسىمالى» ا ق قىزمەت كورسەتۋ جانە كليەنتتەرمەن جۇمىس دەپارتامەنتىنىڭ ديرەكتورى الىبەك سۇلتانوۆ.

سونىمەن بىرگە، ۇيىم قىزمەتكەرلەرى ايىنا 500 دەن استام پويىزدى تەكسەرەدى. 2019 -جىلدىڭ العاشقى 5 ايىندا كومپانيا 2726 پويىزدى تەكسەرىپ، 79 بيلەتسىز جولاۋشىنى، 1,5 توننا راسىمدەلمەگەن جۇكتى تاپقان.

«ۆيدەو اۆتورىنا بەلسەندى ازاماتتىق ۇستانىمى ءۇشىن العىس بىلدىرەمىز جانە تۇرعىنداردى كۇماندى قىزمەتكە جۇگىنبەي، الدىن الا بيلەت ساتىپ الۋعا كەڭەس بەرەمىز. جىل سايىن قازاقستاندا جازعى ۋاقىتتا بيلەت تاپشىلىعى بولادى. بيىل دا كومپانيا جازعى ۋاقىتتا تۇتاس ۆاگون پاركىن جۇمىلدىرىپ، 6 ميلليوننان استام جولاۋشى تاسىمالداۋدى جوسپارلاپ وتىر. الداعى 10 جىلدا كومپانيا جاڭا 1200 ۆاگون ساتىپ الادى»، - دەدى ءا. سۇلتانوۆ.

تاسىمالعا شاعىمدانعان جولاۋشىلار تاۋلىك بويى 1433 بايلانىس ورتالىعىنا نەمەسە الەۋمەتتىك جەلىدەگى كومپانيا پاراقشالارىنا جۇگىنە الادى.