ەكسپو كەشەنىندە «استانا فيلم» اتتى جاڭا كينوستۋديا سالىنىپ جاتىر

  نۇر- سۇلتان. قازاقپارات - ەكسپو حالىقارالىق كورمەسىنىڭ كەشەنى اۋماعىندا «استانا فيلم» اتتى جاڭا جوعارى تەحنولوگيالى كينوستۋديانىڭ قۇرىلىسى بويىنشا جۇمىستار باستالدى.

 بۇگىن حالىقپەن ەسەپتىك كەزدەسۋىندە مادەنيەت جانە سپورت ءمينيسترى اقتوتى رايىمقۇلوۆا وسىلاي ءمالىم ەتتى، دەپ حابارلايدى قازاقپارات ءتىلشىسى.

«ق ر تۇڭعىش پرەزيدەنتىنىڭ تاپسىرماسى بويىنشا وندىرىستىك مۇمكىندىكتەردى كەڭەيتۋ ماقساتىندا ەكسپو حالىقارالىق كورمەسىنىڭ كەشەنى اۋماعىندا «استانا فيلم» اتتى جاڭا جوعارى تەحنولوگيالى كينوستۋديانىڭ قۇرىلىسى بويىنشا جۇمىستار باستالدى. بۇل ءۇشىن قالا اكىمدىگى 23,7 گەكتار جەر ءبولدى. بۇل جاڭا كينو ءوندىرۋشى ورتالىق، سونداي- اق الەمگە ايگىلى Universal, Disneyland جانە باسقا دا ۇلگىدەگى ويىن- ساۋىق جانە دەمالىس ساياباعى بولادى» ، - دەدى مينيستر.

ونىڭ سوزىنە قاراعاندا، جاڭا كارتينالاردى شىعارۋعا ارنالعان بارلىق وتىنىمدەردى كينو سالاسىنداعى بەدەلدى مامانداردان ارنايى قۇرىلعان ساراپشىلىق كەڭەسى قارايدى. سونىمەن قاتار، ىرىكتەۋ ءراسىمىنىڭ اشىقتىعىن قامتاماسىز ەتۋ ءۇشىن كينو جوبالاردى قارجىلاندىرۋ بويىنشا ۇسىنىستاردى ۇكىمەتتىڭ جانىنان قۇرىلعان ۆەدومستۆوارالىق كوميسسيا بەرەدى.

 «ەلىمىزدىڭ پرەمەر- ءمينيسترى اسقار مامينمەن كەزدەسۋ بارىسىندا الەمگە ايگىلى رەجيسسەر، سەناريست، پروديۋسەر تيمۋر بەكمامبەتوۆ ەكى كينو جوباسىنا پروديۋسەر بولۋعا دايىن ەكەنىن بىلدىرگەنىن ايتا كەتكىم كەلەدى» ، - دەدى ا. رايىمقۇلوۆا.