قازاقستاندىق بوكسشىلاردىڭ وليمپيادا جولدامالارىن قالاي الاتىنى بەلگىلى بولدى

None
None
نۇر-سۇلتان. قازاقپارات - ق ر ۇلتتىق وليمپيادالىق كوميتەتى قازاقستاندىق بوكسشىلار الداعى توكيو-2020 وليمپيادا ويىندارىنا جولدامانى قالاي الاتىنىن جازدى، دەپ حابارلايدى قازاقپارات.

كوميتەتتىڭ حابارلاۋىنشا، ح و ك اتقارۋشى كوميتەتىنىڭ لوزاننادا وتكەن وتىرىسىندا 2020 -جىلعى توكيو ويىندارىنا ىرىكتەۋ باسەكەسىن وتكىزۋگە قاتىستى قوسىمشا ۇسىنىستار جاسالعانى تۋرالى ايتىلعان.

وندا، ىرىكتەۋ تۋرنيرلەرى 2020 -جىلدىڭ قاڭتارى مەن مامىرى ارالىعىندا وتەتىنى، جالپى ەسەبى ءتورت باسەكە جوسپارلانعانى، ونىڭ بىرەۋى الەمدىك ىرىكتەۋ باسەكەسى ەكەنى اتاپ وتىلگەن.

ىرىكتەۋ سىندارى وليمپيادا ويىندارىن وتكىزگەن نەمەسە ءتورتجىلدىق دوداسىن ەندى قابىلدايتىن قالالاردا ۇيىمداستىرىلماق.

«قۇرلىقتىق دودا 2020 -جىلدىڭ 1 -قاڭتارى مەن 20 -ءساۋىرى ارالىعىندا وتەدى. ازيا جانە وكەانيا ايماقتىق ىرىكتەۋ باسەكەسىنە قازاقستاندىق بوكسشىلار دا قاتىسپاقشى. بۇل ايماقتا ەرلەر اراسىندا 41، ايەلدەر اراسىندا 22 جولداما ساراپقا سالىنادى. ەرلەر اراسىنداعى جولدامالار تومەندەگى رەتپەن بەرىلەدى: 52,57 جانە 63 كەلىگە دەيىنگى سالماق دارەجەسىنە التى كۆوتا، 69,75 جانە 81 كەلىگە دەيىنگى سالماق دارەجەسىنە بەس كۆوتا، 91 جانە اسا اۋىر سالماقتا ءتورت كۆوتادان بولىنگەن. ايەلدەر اراسىنداعى قۇرلىقتىق تۋرنيردە ليتسەنزيا تومەندەگى ادىسپەن تاراتىلادى: 51 كەلىگە دەيىنگى سالماق دارەجەسىندە التى كۆوتا، قالعان ءتورت سالماققا (57، 60، 69، 75 كەلىگە دەيىنگى سالماق دارەجەسى) ءتورت كۆوتادان بەرىلەدى» دەلىنگەن اتالعان اقپاراتتا.

اتالعان تۋرنيرلەردە ليتسەنزياعا يەلىك ەتە الماعان بوكسشىلار 2020 -جىلدىڭ مامىرىندا وتەتىن الەم چەمپيوناتىندا سىنعا ءتۇسىپ، تاعى ءبىر مارتە وليمپياداعا بارۋ مۇمكىندىگىنە تالاسا الادى.

سونداي-اق، الەمدىك دودادا ەرلەر اراسىندا 31-35، ايەلدەر اراسىندا 19-21 كۆوتا ساراپقا سالىناتىنى بەلگىلى بولدى.

ايتا كەتەيىك، توكيو وليمپياداسىنداعى بوكس باسەكەسى 2020 -جىلدىڭ 25 -شىلدەسى مەن 9 -تامىزى ارالىعىندا وتەدى.

ەستەرىڭىزدە بولسا، وسىعان دەيىن بوكستان توكيو وليمپياداسىنا ىرىكتەۋ كەزەڭى قاشان باستالاتىنى جانە وسىعان دەيىن قازاقستاندىق بوكسشىلار وليمپيادا ويىندارىنان قانشا مەدال جەڭىپ العانى تۋرالى جازعان بولاتىنبىز.

سوڭعى جاڭالىقتار