ەلورداعا گاز كەلسە تاريف قىمباتتاي ما

نۇر-سۇلتان. قازاقپارات - ق ر ەنەرگەتيكا ءمينيسترى قانات بوزىمبايەۆ ەلورداعا گاز كەلسە، ونىڭ باعاسىنىڭ قانشا بولاتىنىن ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، ەلوردا تۇرعىندارى كوگىلدىر وتىنعا 2020 -جىلدىڭ باسىندا قول جەتكىزۋى مۇمكىن.

«ەلورداعا گاز قاشان كەلەدى دەپ كۇتىپ جۇرگەندەر كوپ. بۇل جەردە جەرگىلىكتى اكىمدىكتىڭ جۇمىسىنا كوپ نارسە بايلانىستى. بارلىق توراپتاردى كەستەگە ساي ىسكە قوسىپ ۇلگەرسە، 1 -قاڭتاردان باستاپ گاز تۇتىنا باستاۋىمىز مۇمكىن»، - دەيدى مينيستر ق. بوزىمبايەۆ.

ول سونداي-اق، كوگىلدىر وتىن باعاسى استانالىقتار ءۇشىن قانداي بولاتىنى ءالى دە باسى اشىق ماسەلە ەكەنىن ايتتى.

«قوسىمشا جۇمىستار تۋىنداپ، گازبەن قامتۋ شىعىندارى ارتپاسا، گاز باعاسى دا وزگەرمەۋى كەرەك. ازىرگە ناقتى قانشا بولاتىنىن ايتۋ قيىن. بۇل ماسەلەنى ءتيىستى ورىندارمەن بىرگە جىلدىڭ ەكىنشى جارتىسىندا تالقىلايمىز. سول كەزدە ناقتى بەلگىلى بولادى»، - دەدى ەنەرگەتيكا ءمينيسترى.

سونداي-اق، بوزىمبايەۆ جانارماي ستانسالارىندا كوگىلدىر وتىننىڭ نەلىكتەن قىمباتتاپ جاتقانىن ءتۇسىندىردى.

«وسىدان بىرنەشە جىل بۇرىن كوگىلدىر وتىن باعاسى 3 ەسەگە ءتۇسىپ، زاۋىتتار توقتاپ قالا جازداعان. شىندىعىن ايتساق، سىعىمدالعان گازدى جانارماي رەتىندە ساتۋدان وندىرۋشىلەرگە پايدا كوپ ەمەس. تىم بولماعاندا شىعىنعا باتپاۋى ءۇشىن باعانى سانالى تۇردە كوتەرىپ وتىرمىز»، - دەدى ول.

مينيستر ءوز سوزىندە، 27 جىل بويى گازدى وڭدەمەي، شيكىزات كۇيىندە تۇتىنۋ بەلەڭ العانىن، قازىر بۇل جاعداي وزگەرىپ، جوعارى تەحنولوگيالارعا بەت بۇرۋ باستالعانىن جەتكىزدى.

ەسكە سالساق، ەنەرگەتيكا ءمينيسترى ەل الدىنداعى ەسەپتىك كەزدەسۋى بارىسىندا سارىارقا گاز قۇبىرىن سالۋعا 2200 ادام تارتىلعانىن ايتقان بولاتىن.