اقتوبەدە مالشى تاۋىپ العان اسكەري سناريادتى ساپەرلار جارىپ جىبەردى
شالقاردىڭ موڭكە بي اۋىلى ماڭىنداعى دوڭگەلەككول جايىلىمىنان مالشى جارىلعىش زات تاۋىپ الدى. مالشى بىردەن اۋىلداعى ۋچاسكەلىك پوليتسياعا حابار بەردى. ال پوليتسيا قىزمەتكەرى 30238 اسكەري ءبولىمىنىڭ كەزەكشىسىنە ايتتى. «باتىس» وڭىرلىك قولباسشىلىعىنىڭ تاپسىرماسىمەن 30238 اسكەري ءبولىمىنىڭ جارىلعىش زاتتى جويۋ توبى اۋماققا جىبەرىلدى.
«بۇل دالادان تابىلعان العاشقى جارىلعىش زات ەمەس. 2015 -جىلدان بەرى ونعا جۋىق جارىلعىش زات تابىلىپ، جويىلدى. ولاردىڭ ءبارىن جەرگىلىكتى تۇرعىندار تاۋىپ الادى»، - دەدى 30238 اسكەري ءبولىمىنىڭ كومانديرى رۋسلان وتەپوۆ.
جارىلعىش زات انىقتالعان اۋماق بىردەن قورشالىپ، 85 ميلليمەترلى سناريادتىڭ تاسىمالداۋعا جارامسىز ەكەنى انىقتالدى. سوندىقتان تابىلعان جەرىندە جارۋ جونىندە شەشىم قابىلداندى.
«كەڭەس وداعى كەزىندە ەمبى پوليگونى زەرتتەۋ جۇمىستارىن جۇرگىزۋگە، اسكەري تەحنيكا مەن قارۋلى كۇشتى سىناۋعا باعىتتالدى. قازىرگى كەزدە وسى اۋماقتان ءتۇرلى زات تابىلىپ جاتىر. سنارياد تا سول كەزەڭنەن قالعان بولۋى مۇمكىن»، - دەدى 30238 اسكەري ءبولىمى جارىلعىش زاتتى جويۋ توبىنىڭ كومانديرى اسلان بايماعامبەتوۆ.
اۋە قورعانىس كۇشتەرى اسكەري ينستيتۋتىنىڭ باسپا ءسوز قىزمەتى كەز كەلگەن جاعدايدا جارىلعىش زاتقا جاقىنداۋعا بولمايتىنىن ەسكەرتەدى. ەگەر دالادان تابىلسا، دەرەۋ پوليتسياعا حابار بەرۋ قاجەت. ءوز بەتىمەن تاسىمالداۋ، مەتالل قابىلداۋ ورنىنا تاپسىرۋ قاۋىپتى.