وتاندىق كولىكتەردى الۋعا بولىنەتىن نەسيە بەس ەسەگە ارتادى - ق ر پرەمەر-ءمينيسترى

نۇر-سۇلتان. قازاقپارات - ق ر پارلامەنتى پالاتالارىنىڭ بىرلەسكەن وتىرىسىندا ق ر ۇكىمەت باسشىسى اسقار مامين ەلىمىزدە اۆتوكولىك ونەركاسىبىن دامىتۋ جوسپارى تۋرالى ايتىپ بەردى، دەپ حابارلايدى قازاقپارات ءتىلشىسى.

«5 ايدىڭ قورىتىندىسى بويىنشا اۆتوونەركاسىپ سالاسى وتكەن جىلدىڭ سايكەس كەزەڭىمەن سالىستىرعاندا 46 پايىزعا ءوستى. وسى سالا وڭدەۋشى سەكتوردىڭ ماڭىزدى قۇرامداس بولىگىنە اينالۋدا، سونداي-اق ونىڭ وسىمىندە ۇلكەن الەۋەت بار. ەگەر دە وتكەن جىلى 30 مىڭعا جۋىق اۆتوموبيل شىعارساق، بيىل 60 مىڭعا تارتا كولىكتى ۇسىنۋ جوسپارلانىپ وتىر»، - دەدى مامين.

وسى ورايدا ول 2021-جىلعا قاراي اتالعان كورسەتكىشتى 100 مىڭ اۆتوموبيلگە جەتكىزۋ ماقساتى تۇرعانىن اتاپ ءوتتى.

«بۇگىندە بىزدە 4,5 ميلليونعا تارتا كولىك بار. ونىڭ ىشىندە 2,5 ميلليونى 20 جىلدان استام ۋاقىت بويى پايدالانىلىپ كەلەدى جانە ولار تاياۋ ارادا ۋتيليزاتسياعا جاتقىزىلادى. نارىق شىنىمەن دە اۋقىمدى. ونى جەرگىلىكتى ءوندىرىس ەسەبىنەن تولىقتىرىپ، ءتيىستى قارجىلىق تەتىكتەردى ۇسىنۋدى جوسپارلاپ وتىرمىز»، - دەدى ۇكىمەت باسشىسى.

اۆتونەسيەلەۋ جاعدايىنا توقتالعان ول، «ەگەر دە بىلتىر جەڭىلدىكپەن اۆتونەسيەلەۋ بويىنشا 3,2 مىڭ كولىكتى قارجىلاندىرساق، بيىل نەسيەلەۋ كولەمىن 15 مىڭ كولىككە دەيىن جەتكىزۋ جوسپارلانىپ وتىر. ياعني وتاندىق اۆتوكولىكتى ساتىپ الۋعا بولىنەتىن نەسيە كولەمىن بەس ەسەگە ارتتىرماقپىز»، - دەدى.