بۇرىنعى پرەزيدەنتكە جەمقورلىق بويىنشا ايىپ تاعىلدى
ساركوزيدىڭ سوتى جۋىق ايلاردا بولۋى مۇمكىن. بۇل تۋرالى 19-ماۋسىمدا AFP اگەنتتىگى حابارلادى.
فرانسيانىڭ كاسساتسيالىق سوتى ساركوزي ءىسى بويىنشا سوت تالقىلاۋىن وتكىزۋگە قاۋلى قابىلدادى. ساركوزيمەن قاتار، ونىڭ ادۆوكاتى تەرري حەرتسوگ پەن بۇرىنعى سۋديا جيلبەر ازيبەردەن دە سوتتا جاۋاپ الىنادى.
ساركوزي 2007-جىلعى پرەزيدەنتتىك كامپانياسى ءۇشىن L'Oreal مۇراگەرى ليليان بەتتانكۋردەن زاڭسىز تولەمدەر قابىلدادى دەگەن ايىپتاۋمەن تەكسەرىس جۇرگىزگەن تەرگەۋشىلەر حەرتسوگ پەن ازيبەردىڭ تەلەفون سۇحباتىن جازىپ العان. تەرگەۋ بارىسىندا ساركوزي مەن حەرتسوگ جالعان ەسىمدەرمەن تىركەلگەن ۇيالى تەلەفونداردى قولدانعان.
تەرگەۋشىلەر ساركوزيدىڭ ءوزى پول ۆيسمۋت دەگەن بۇركەنشىك اتپەن سويلەسكەنىن ايتىپ وتىر.
France 24 ساياسي رەداكتورى مارك پەرەلماننىڭ پىكىرىنشە، ەگەر ساركوزيگە تاعىلعان ايىپتاۋلاردىڭ بارلىعى دالەلىن تاپسا، ول «10 جىلعا دەيىنگى مەرزىمگە جابىلۋى» مۇمكىن.
2014-جىلى ساركوزي تەرگەۋدىڭ باسىندا پوليتسيا قاماۋعا العان فرانسيانىڭ العاشقى پرەزيدەنتى بولعان.
الايدا، ول فرانسيانىڭ سوت جاۋاپقا تارتقان العاشقى ەكس-پرەزيدەنتى ەمەس. وعان دەيىن، جاك شيراك تا 2011-جىلى جاۋاپقا تارتىلىپ، پاريجدىڭ مەرى بولعان تۇستا مەملەكەت قاراجاتتارىن وڭدى-سولدى جۇمساعانى ءۇشىن ەكى جىلعا شارتتى تۇردە سوتتالعان.
ال ەگەر ساركوزيدىڭ تەرگەۋى جالعاسا بەرسە، ول فرانسيانىڭ پرەزيدەنت كەزىندەگى ارەكەتتەرى ءۇشىن سوتتالعان العاشقى ەكس-پرەزيدەنتى بولۋى مۇمكىن.
ساركوزيگە قاتىستى، ول 2012-جىلى فرانسيا پرەزيدەنتى لاۋازىمىنا قايتا سايلانۋعا بەرگەن ءوتىنىمى ءساتسىز بولعالى سوت تارتىبىندە تەرگەۋ ءجۇرىپ جاتىر. وتكەن ايدا جوعارعى سوت 2012-جىلعى كامپانيانى زاڭسىز قارجىلاندىردى دەگەن ايىپتاۋ بويىنشا ەكىنشى رەت سوت تالقىلاۋىنان سىتىلىپ شىعۋ ءۇشىن بەرگەن اپەللياتسياسىن قايتاردى.
ايىپتاۋشىلار ساركوزي قايتا سايلانۋ ءۇشىن جالعان ەسەپشوتتار ارقىلى 43 ميلليون ەۋروعا جۋىق قاراجات جۇمساعانىن ايتادى. بۇل - زاڭمەن بەلگىلەنگەن 22,5 ميلليون ەۋرودان ەكى ەسەدەي كوپ.