قوعام قايراتكەرلەرى ەلىمىزدىڭ شەكاراسى قالاي بەكىتىلگەنىن ەسكە الدى
ساليقالى وي، سۇڭعىلا ساياسات ۇستانىپ، ەڭ الدىمەن شەكارانى شەگەندەپ، ۇلتتىق قاۋىپسىزدىككە ايرىقشا كوڭىل ءبولدى. ەلدىڭ تىنىشتىعى مەن بەيبىت ءومىرى، مىزعىماس بىرلىگىن نىعايتۋ ءۇشىن ماڭىزدى تاريحي شەشىمدەرگە قول جەتكىزدى. قازاقستان ءوز تاۋەلسىزدىگىن جاريالاپ، دەربەس مەملەكەت اتانعان سوڭ الەمدىك ساياسي كارتادا رەسپۋبليكانىڭ شەكاراسىن ايقىنداۋ مىندەتى تۇردى. دەسە دە رەسەي، قىتاي سىندى الپاۋىت ەلدەرمەن، باۋىرلاس تۇرىكمەنستان، وزبەكستان جانە قىرعىزستانمەن اراداعى شەكارا شەبىن بەلگىلەۋ وڭايعا تۇسپەگەنى انىق.
ەل مەن جەر تاعدىرى شەشىلەر، كۇرمەۋى قيىن ماسەلەدە كورشىلەرمەن ورتاق مامىلەگە كەلدى. 2001 -جىلى جاسالعان دەلەميتاتسيا جانە دەماركاتسيا جونىندەگى كەلىسىمگە سايكەس ەلىمىز ەڭ العاشقى بولىپ قىرعىزستانمەن اراداعى 1241 شاقىرىمدىق شەكارانى بەكىتتى. جالپى، قازاقستاننىڭ رەسەيمەن اراداعى شەكاراسى - 7591 شاقىرىم، ق ح ر - 1782، وزبەكستانمەن - 2351، تۇرىكمەنستانمەن 426 شاقىرىمدى قۇرايدى.
ءۋاليحان قاليجان، ق ر ەڭبەك سىڭىرگەن قايراتكەرى:
- مەن ول كەزەڭدەردە پارلامەنت ءماجىلىسىنىڭ دەپۋتاتى ەدىم. وزبەكستان مەن ق ح ر اراسىنداعى شەكارانى دەلەميتاتسيا- دەماركاتسيالاۋ جونىندەگى زاڭداردى جۇرگىزگەنمىن. وسى كەزەڭدە نۇرسۇلتان ءابىش ۇلى: «قازاقتىڭ ءبىر مەتر جەرى كەتىپ قالماسىن»، - دەدى. بىزگە «تاباندى بولىڭدار» دەدى. وسى كەزەڭنەن باستاپ قازاقستان رەسپۋبليكاسىنىڭ رەسەيمەن، وزبەكستانمەن، قىرعىزستانمەن، قىتايمەن شەكاراسىن شەگەندەۋ ماسەلەسى كۇن ءتارتىبىنىڭ العاشقى كەزەڭىنە قويىلدى.
عاني قاسىموۆ، ق ر كەدەن قىزمەتىنىڭ گەنەرال- مايورى:
- تاۋەلسىزدىكتىڭ العاشقى جىلدارى مەملەكەتتىك دامۋ عانا ەمەس، دەربەستىكتى ساقتاپ تۇرۋدىڭ ءوزى قيىن بولدى. شەكارانى بەرىك ۇستاۋ، ءار تاسىنا دەيىن تاڭبالاپ، بەكىتۋ قاجەت بولدى. شەكارالىق ءارى كەدەندىك باقىلاۋ بەكەتتەرىن ورناتۋدى كورشىلەرىمىزبەن بىرىگىپ جاسادىق. ال 1992 -جىلى پرەزيدەنت جارلىعىمەن ق ر ۇلتتىق قاۋىپسىزدىك كوميتەتى قۇرىلدى. كوميتەت قۇرىلىمىنداعى بارلىق وزگەرىستەر الەمدەگى جانە ەلدەگى احۋالمەن تىعىز بايلانىستى بولدى.
«ەلباسى تاپسىرماسى جانە ۋاقىت تالابىمەن ايقىندالىپ وتىرادى. كوميتەت جۇمىسىنداعى ناقتى مىندەتتەردى بەكىتىپ، كادرلىق قۇرىلىمدى، زاڭنامالىق قۇجاتتاردى جاساۋ ەلباسىنىڭ قاتاڭ باقىلاۋىندا بولدى»، - دەيدى ق ر ۇ ق ك ەڭ العاشقى ءتورعاسى بولات باەكەنوۆ.
بولات باەكەنوۆ، ق ر ۇ ق ك ءبىرىنشى ءتوراعاسى، گەنەرال- لەيتەنانت:
- نۇرسۇلتان ءابىش ۇلى ۇلتتىق قاۋىپسىزدىك قىزمەتىنىڭ قۇرىلۋى مەن دامۋىنا ەرەكشە كوڭىل ءبولدى. اپتا سايىن رەسپۋبليكاداعى ۇلتتىق قاۋىپسىزدىك جاعدايى تۋرالى دايىندالاتىن ەسەپتىك- باياندامانى مۇقيات زەردەلەيتىن. كەمشىلىكتەردى بايقاسا، دەرەۋ دۇرىس ورىندالۋىن تالاپ ەتەتىن. ەلباسى نۇرسۇلتان نازاربايەۆ ەلدە بەيبىت ءومىر قايماعىنىڭ بۇزىلماۋىنا بارىنشا كۇش سالدى. ىشكى ءتارتىپتى كۇشەيتىپ، سىرتقى قاۋىپسىزدىككە قاتەر تونبەۋىن قاداعالادى. كورشىلەرمەن دوستىق ءارى ىنتىماقتاستىق قارىم- قاتىناس ورناتتى. بۇل 30 جىل ەل باسقىرعان تۇڭعىش پرەزيدەنتتىڭ قول جەتكىزگەن جەتىستىكتەرىنىڭ ءبىرسىپىراسى عانا.