اقتوبەلىك كاسىپكەر بەس وتباسىعا پاتەر سىيلادى
اقتوبەدەگى جۇبانوۆتار الەمى ورتالىعىن سالعان مايتەكوۆتەر وتباسى كوپبالالى انالارعا قۋانىش سىيلادى. بارلىعى بەس وتباسى 1 جانە 2 بولمەلى پاتەرگە يە بولدى. ولاردىڭ اراسىندا كوپبالالى، مۇگەدەك بالا باعىپ وتىرعاندار مەن جالعىزباستى انا بار.
سونىمەن قاتار شىلدە ايىنان باستالاتىن «باقىتتى وتباسى» جوباسىنىڭ العاشقى قاتىسۋشى 20 وتباسىعا 500 مىڭ تەڭگەنىڭ سەرتيفيكاتىن سىيلادى.
بۇل وتباسىلار العان قاراجاتىن پاتەردىڭ العاشقى جارناسىنا جۇمسايتىن بولادى. شاراعا وبلىس اكىمى وڭداسىن ورازالين قاتىسىپ، باسپانالى بولعان ازاماتتاردى قۇتتىقتادى. قايىرىمدىلىق جاساعان كاسىپكەر ازاماتقا العىسىن ءبىلدىردى.
«وبلىس بويىنشا 30 مىڭ ادام باسپانا كەزەگىندە تۇرسا، ولاردىڭ ىشىندە 23500 ءى اقتوبە قالاسىندا. بۇل ماسەلە بىردەن شەشىلمەيدى، ءبىراق ءتيىستى جۇمىستار جۇرگىزىلىپ جاتىر. ءبىز ەڭ الدىمەن اسا مۇقتاج جانداردى باسپانامەن قامتاماسىز ەتۋ ءۇشىن بارلىق مۇمكىندىكتى جاسايمىز. وسى جىلدىڭ وزىندە وبلىستا 1 ميلليون شارشى مەتردەن اسا تۇرعىن ءۇي سالىنادى، بۇل دەگەنىڭىز 8 مىڭنان اسا پاتەر. ولاردىڭ جارتىسى مەملەكەتتىڭ قولداۋىنىڭ ارقاسىندا از قامتىلعان وتباسىلارعا ءتيىمدى شارتتارمەن بەرىلەتىن بولادى. دەمەۋشىلەردىڭ بەرگەن قارجىسىنا 2-3 ازاماتقا پاتەر الۋعا دا بولادى. الايدا، سول قارجىنى 20-30 ادامعا العاشقى جارنا رەتىندە بەرگەن ءتيىمدى بولىپ وتىر. ويتكەنى، ولار جالدامالى پاتەرگە تولەيتىن قاراجاتتى ەندى ءوز مەنشىگىندە قالاتىن باسپاناسى ءۇشىن تولەيدى. وتكىر ماسەلە وسىلاي جۇيەلى تۇردە شەشىلىپ كەلەدى»، - دەدى وبلىس باسشىسى.
قايىرىمدىلىق شارا حالىق ءارتىسى، ق ر ەڭبەك سىڭىرگەن قايراتكەرى ءانشى نۇرلان ءابدۋلليننىڭ كونسەرتىمەن جالعاستى. كونسەرت بيلەتىنەن تۇسكەن قارجى تۇگەلدەي ءتۇرلى الەۋمەتتىك توپتاعى ازاماتتارعا بەرىلەدى.