سەناتورلار گەكتارلاپ جۇلىنىپ جاتقان شۇعىنىق گۇلىنىڭ تاعدىرىنا الاڭداۋلى

نۇر- سۇلتان. قازاقپارات - الەمدە سيرەك كەزدەسەتىن شۇعىنىق گۇلىنەن ايىرىلىپ قالۋىمىز مۇمكىن.

بۇل تۋرالى بۇگىن سەناتتا وتكەن «قازاقستانداعى بيولوگيالىق الۋانتۇرلىلىكتىڭ ساقتالۋىن زاڭنامالىق قامتاماسىز ەتۋدىڭ وزەكتى ماسەلەلەرى» اتتى ۇكىمەت ساعاتىندا سەناتور مۇحتار قۇل- مۇحاممەد ايتتى، دەپ حابارلايدى قازاقپارات ءتىلشىسى.

 «وتكەن جىلى شىعىس قازاقستان وبلىسىنا بارعان كەزدە مىنانداي ءبىر جاعدايعا تاپ بولدىق. ءبىزدىڭ اتا- بابالارىمىزبەن بىرگە مىڭداعان جىل بويى جاساپ كەلە جاتقان ءبىر كيەلى ءشوپ، گۇل بار. ونىڭ اتى شۇعىنىق دەپ اتالادى. شۇعىنىق گۇلى قىتاي تاۋلارىندا، تارباعاتايدا، ءىشىنارا الاتاۋدا وسەدى. ورتالىق ازيادا باسقا بىردە- ءبىر جەردە كەزدەسپەيدى. قازىرگى كەزدە وسى گۇلدىڭ تامىرىنداعى ءبىر قۇرتتى الۋ ءۇشىن، جۇزدەگەن گەكتار شۇعىنىقتىڭ تاۋدىڭ ەتەگىندەگى القابى قۇرتىلىپ كەتىپ جاتىر. ودان قىتايلار ءدارى جاسايدى ەكەن»، - دەدى مۇحتار قۇل- مۇحاممەد.

سەناتور ەگەر ءدال وسىنداي جابايى جولمەن گۇلدەردى قۇرتۋ جالعاساتىن بولسا، وندا ءبىز الەمدەگى سيرەك كەزدەسەتىن گۇلدىڭ وسى تۇرىنەن ايىرىلىپ قالۋىمىز مۇمكىن ەكەندىگىن باسا ايتتى.

«بۇگىندە مەملەكەتىمىزدىڭ كەڭ بايتاق دالاسىندا وسىمدىك كوپ. وكىنىشكە وراي، بىزدە وسىمدىك الەمىن تەك قانا ەرەكشە قورعالاتىن تابيعي قورىقتاردا قورعايمىز. قالعان جەرلەردە، 60 ميلليون گەكتار جەرىندەگى ءشوپ ەشقانداي زاڭمەن قورعالمايدى»، - دەدى وسى ماسەلەگە قاتىستى جاۋاپ بەرگەن ق ر ەكولوگيا، گەولوگيا جانە تابيعي رەسۋرستار ۆيتسە- ءمينيسترى ەرلان نىسانبايەۆ.

 ونىڭ ايتۋىنشا، ەلىمىزدىڭ بۇكىل اۋماعىنداعى وسىمدىكتەردى قورعاۋ ءۇشىن «وسىمدىك الەمى تۋرالى» زاڭ قابىلداۋ قاجەت. قازىرگى ۋاقىتتا مۇنداي زاڭنىڭ تۇجىرىمداماسى دايىندالىپ تا جاتىر. «زاڭ قابىلدانعاننان كەيىن ەلىمىزدىڭ كەز كەلگەن جەرىندەگى وسىمدىك الەمىن قورعاۋعا مۇمكىندىك تۋادى. بۇگىنگى كۇنگە قاتىستى ايتار بولساق، شۇعىنىق گۇلىن قورعاۋ ءۇشىن ايماقتارعا ناقتى تاپسىرمالار بەرىلگەن، باقىلاۋدا. قىزىل ميانى دا باقىلاۋدا ۇستاپ وتىرمىز»، - دەدى ۆيتسە- مينيستر.