قازاقستاندىق فيلم شاڭحاي كينوفەستيۆالىنىڭ نەگىزگى بايقاۋىنا قاتىسىپ جاتىر

الماتى. قازاقپارات - قىتايدا ءوتىپ جاتقان شاڭحاي حالىقارالىق كينوفەستيۆالىنىڭ اياسىندا ەرمەك تۇرسىنوۆتىڭ «شىراقشى» كوركەم فيلمىنىڭ الەمدىك تۇساۋكەسەرى ءوتتى، دەپ حابارلايدى قازاقپارات ءتىلشىسى.

قازاقستاندىق كارتينا فەستيۆالدىڭ نەگىزگى بايقاۋ باعدارلاماسىنا قاتىسادى. ول قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسىمەن «قازاقفيلم» ا ق جانە «Tursunov Film» كومپانياسىمەن بىرگە تۇسىرىلگەن. «شىراقشى» فيلمىنىڭ تۇساۋكەسەرىنە وراي شاڭحايدا باسپا ءسوز ءماسليحاتى ءوتتى. وعان «قازاقفيلم» ا ق- نىڭ ءبىرىنشى ۆيتسە- پرەزيدەنتى سەرىك جۇباندىقوۆ، فيلمنىڭ رەجيسسەرى قانات تورەباي، جەلىلىك پروديۋسەر ديانا ءاشىموۆا جانە فيلمدەگى باستى اكتەر مۇرات مۇقاجانوۆ قاتىستى. سەرىك جۇباندىقوۆ فەستيۆال قوناقتارىن قۇتتىقتاپ، قازاقستان مەن قىتاي اراسىنداعى ىنتىماقتاستىق تۋرالى اڭگىمەلەدى.

 

پروديۋسەر قانات تورەباي فيلمنىڭ ءتۇسىرىلىمى، تاريحى جونىندە ايتىپ بەردى. مۇرات مۇقاجانوۆ نەگىزگى كەيىپكەردىڭ بەينەسىن سومداۋداعى ەرەكشەلىكتەرمەن ءبولىستى. ال جەلىلىك پروديۋسەر ديانا ءاشىموۆا قازاقستاندىق كينو العاش رەت شاڭحاي كينوفەستيۆالىنىڭ نەگىزگى بايقاۋىنا قاتىسىپ جاتقانىن ايتتى. فيلم سوعىستان ورالعان جاۋىنگەردىڭ تاريحىن باياندايدى. وعان نەمىس قارياسى كينواپپارات سىيلايدى.

 سولدات ءومىرىنىڭ سوڭىنا دەيىن سول كينوپروەكتورمەن ايىرىلماي جۇرەدى. شانحاي فەستيۆالى قىتايداعى ەڭ ءىرى كينوفەستيۆال. حالىقارالىق قازىلار القاسىن بەلگىلى تۇرىك رەجيسسەرى، كانن كينوفەستيۆالىنىڭ التىن پالمالىق بولىمشەسىنىڭ لاۋرەاتى نۋري بيلگە دجەيلان باسقارادى. شارا 24 ماۋسىمعا دەيىن جالعاسادى. 1993 -جىلى قازان ايىندا مۇندا تۇڭعىش رەت 33 ەلدىڭ 167 فيلمى كورسەتىلگەن. وعان 300 مىڭ كورەرمەن كەلىپ، قازىلار القاسىنىڭ قۇرامىندا كارەن شاحنازاروۆ پەن وليۆەر ستوۋن بولدى. 2001 -جىلعا دەيىن فەستيۆال ەكى جىل سايىن وتكىزىلدى. كەيىن جىل سايىن ۇيىمداستىرۋ شەشىمى قابىلداندى.