باقىتبەك سماعۇل: «ايبىن» اسكەري- پاتريوتتىق جيىنى جاستاردىڭ بويىنداعى كوپ دەرتكە داۋا
ق ر پارلامەنتى ءماجىلىسىنىڭ دەپۋتاتى باقىتبەك سماعۇل قاراعاندى وبلىسىنىڭ «سپاسسك» وقۋ- جاتتىعۋ ورتالىعىندا ءوتىپ جاتقان رەسپۋبليكالىق اسكەري- پاتريوتتىق جيىنعا قاتىستى وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
دەپۋتات «ايبىننىڭ» باستاۋىندا تۇڭعىش پرەزيدەنت نۇرسۇلتان نازاربايەۆتىڭ «جاس سارباز» سياقتى پاتريوتتىق كلۋبتار قۇرۋ تۋرالى باستاماسى تۇرعانىن ايتادى.
«پرەزيدەنت سايلاۋدان كەيىن انت قابىلداعان كەزدە قازاقستان قارۋلى كۇشتەرىنىڭ الدىندا قوشەمەت كورسەتىلگەنىن بىلەسىزدەر. بۇل كەز كەلگەن مەملەكەتتىڭ ەلدىگىن بىلدىرەتىن نىشاندى شارا. وتكەن جىلى ەلباسى جاس ساربازدار بىرلەستىگىن قۇرۋعا باستاما كوتەرگەن بولاتىن. سول باستاما بويىنشا قازاقستاننىڭ بارلىق جەرىندە كلۋبتار قۇرىلدى. اسكەر - تىنىشتىق پەن تۇراقتىلىعىمىزدىڭ كەپىلى» ، - دەيدى ءماجىلىس دەپۋتاتى.
سونىمەن قاتار، ول قازىر جاس جەتكىنشەكتەردىڭ تۇسىنىكسىز ترەندتەرگە قۇمارتىپ، ارەكەتتەرى ۇساقتالىپ بارا جاتقانى تۋرالى سىن كوپ ايتىلاتىنىن العا تارتادى. ونىڭ ايتۋىنشا، بۇگىنگى «ايبىن» اسكەري- پاتريوتتىق جيىنى سول «دەرتتەرگە» داۋا بولاتىنىن ايتادى.
«جىگىتكە جىگىتتىك سيپات پەن رۋح بەرەتىن ول - ارميا. سوندىقتان دا بۇگىنگى «ايبىنعا» جوعارعى باس قولباسشىنىڭ بارۋى كەشەگى جاۋىنگەر رەتىندە مەنى دە جىگەرلەندىرەدى. بۇل شاراعا قازاقستاننىڭ بارلىق ايماقتارىنان پاتريوتتىق كلۋبتاردىڭ ايبىندى جاستارى كەلگەن. سول جاستاردىڭ بارلىعى شىڭدالىپ، وتاننىڭ تۇتاستىعىنا، مەملەكەت رەتىندە قاۋقارلى بولۋىنا بىردەن- ءبىر جاۋاپتى وزدەرى ەكەنىن ۇعىنادى. اۋە مەن تەڭىزدە، قۇرلىق پەن تاۋ- تاستا ءبىزدىڭ ارميا ءوزىن ەركىن سەزىنەتىندەي قاۋقار الىپ كەلەدى. سونى ءبىز دامىتا ءتۇسۋىمىز كەرەك. وتان الدىنداعى بورىشىن وتەگەن ادام ءومىردىڭ ءمانىن شىنايى تۇسىنەدى. بۇگىنگى «ايبىننان» باستاپ، مەكتەپتەگى العاشقى اسكەري دايىندىق ءپانى، مەكتەپتىڭ ساپىندا تۇرۋ، ازاماتتىق مىندەتتى وزىنە جۇكتەۋ، ازاماتتىق بورىشتى اقتاۋ، وتاندى ساقتاۋ، اردى تاپتاپ وتپەۋ، سونىڭ بارلىعى دا سپاسسكتە بولىپ جاتقان «ايبىننىڭ» ۇرانىمەن ۇندەس» ، - دەيدى حالىق قالاۋلىسى.
ءماجىلىس وكىلى بۇل جيىن جىل سايىن وسى دەڭگەيىنەن تۇسپەي، ءداستۇرلى وتسە دەگەن تىلەگىن دە ءبىلدىردى. «وسىنداي شارالاردان بارىپ وتانعا دەگەن سۇيىسپەنشىلىك تۋادى. قازىر وتاندى قويىپ، اتا- اناعا ماسىل بولىپ جاتقاندار بار. ال «ايبىننان» وتكەن جاستار ول جولعا تۇسپەيدى. «ايبىنعا» پرەزيدەنتتىڭ ارنايى بارعانىن، ءوز كوزىمەن كورگەنىن سالاعا دەگەن قامقورلىق پەن قولداۋ دەپ بىلەمىن. جوعارعى قولباسشىنىڭ نەمقۇرايلى قاراماۋى ۇلكەن ءۇمىت ۇيالاتادى. اۋعان سوعىسى ارداگەرلەرىنىڭ قاۋىمداستىعى وسى «ايبىننىڭ» قۇرىلۋىنا تىكەلەي اتسالىسىپ، قۇجاتتارىن دايىنداسقان بولاتىن. بۇل جيىن ءبىر جىلمەن شەكتەلمەۋى كەرەك دەپ ويلايمىن. قازىر ءبىز ماڭايىمىزبەن دوستىق پەيىلدە سىناققا ءتۇسىپ جاتىرمىز. گەوگرافيالىق تۇرعىدا تۇتاستىعى مىعىم ەلىمىزدى قورعايتىن جاستاردى ەرتە باستان تاربيەلەۋ - تۇسىنگەن جانعا ۇلكەن ستراتەگيالىق قادام» ، - دەگەن دەپۋتات ءسوزىنىڭ سوڭىن سۋىرىپ سالعان ولەڭىمەن تۇيىندەدى:
ماڭگىلىك ەل ەتەم دەسەڭ قازاقتى،
وزگەگە ەمەس، وزىڭە قوي تالاپتى.
ايەل - قازىق، ەركەك - باقان ءار ۇيدە،
وتباسىنا ەر ازامات جاۋاپتى، - دەيدى ول.