قاراعاندى وبلىسىندا «ايبىن» اسكەري- پاتريوتتىق جاستار جيىنى ءوتىپ جاتىر

None
None
 قاراعاندى. قازاقپارات - 17-22 - ماۋسىم ارالىعىندا قاراعاندى وبلىسىنداعى «سپاسسك» وقۋ ورتالىعىنىڭ پوليگون بازاسىندا جاستار جىلى اياسىنداعى بەسىنشى رەسپۋبليكالىق «ايبىن» اسكەري- پاتريوتتىق جاستار جيىنى وتۋدە، دەپ حابارلايدى قازاقپارات ءتىلشىسى.

ءىس- شاراعا قازاقستان رەسپۋبليكاسىنىڭ پرەزيدەنتى - قارۋلى كۇشتەردىڭ جوعارعى باس قولباسشىسى قاسىم- جومارت توقايەۆ قاتىستى. سونداي- اق اسكەري پوليگونعا قورعانىس ءمينيسترى، گەنەرال- مايور نۇرلان ەرمەكبايەۆ، پارلامەنت دەپۋتاتتارى، قاراعاندى وبلىسى اكىمدىگىنىڭ باسشىلىعى، قارۋلى كۇشتەر ارداگەرلەرى مەن شاقىرىلعان قوناقتار جينالدى. شارا باستالار الدىندا ەل پرەزيدەنتى - جوعارعى باس قولباسشى دالا لاگەرىنە، «ايبىن» دوستىق مەكەنى اللەياسىنا، جاستار الاڭىنا، وقۋ ورىندارىنا، اتىس قارۋىنىڭ، اسكەري تەحنيكا ۇلگىلەرى مەن باسقا دا تەحنيكالىق قۇرالداردىڭ كورمەسىنە باردى. جيىنعا قاتىسۋشىلار الدىندا سويلەگەن سوزىندە قازاقستان رەسپۋبليكاسىنىڭ پرەزيدەنتى اشىلاتىن ءىس- شارانىڭ ماڭىزىن اتاپ ءوتتى. سونىمەن قاتار، ول بەسىنشى رەسپۋبليكالىق «ايبىن» اسكەري- پاتريوتتىق جاستار جيىنى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ جاريالاعان جاستار جىلى اياسىندا وتكىزىلەتىنىن اتاپ ءوتتى.

«وتانىمىزعا ادال، جاۋاپكەرشىلىگى جوعارى، قايراتتى جانە قايسار جاستارىمىزدىڭ باسىن قوسقان بۇل جيىننىڭ ءمان- ماڭىزى ايرىقشا. ءبىز تاۋەلسىز ەلىمىزدىڭ بۇگىنگى جاستارىنا ءارقاشان زور ءۇمىت ارتامىز، سەنەمىز. قازاقستاننىڭ ءاربىر جەتىستىگى وزدەرىڭىز سياقتى جاس ورەندەردىڭ الاڭسىز، جارقىن كەلەشەگى ءۇشىن جاسالعان قادام. بۇگىندە ەلىمىزگە بارشا الەم قاۋىمداستىعى قۇرمەتپەن قارايدى. مەملەكەتىمىز قارقىندى دامۋدا. مۇنىڭ بارلىعى تاريحي تۇرعىدان العاندا قىسقا مەرزىمدە اتقارىلعان تاباندى ەڭبەكتىڭ ناتيجەسى. ەلىمىزدىڭ ابىراويىن ارتتىرۋ سىزدەردىڭ وتان الدىنداعى قاستەرلى بورىشتارىڭىز. جاقسى داستۇرگە اينالعان «ايبىن» اسكەري- پاتريوتتىق جاستار جيىنى - وتانشىل جاستاردى ادال قىزمەت ەتۋگە، ەل قورعانى بولۋعا تاربيەلەيتىن بىرەگەي الاڭ» ، - دەپ اتاپ ءوتتى قاسىم- جومارت توقايەۆ.

 وسكەلەڭ ۇرپاقتى تاربيەلەۋ ماسەلەلەرىندەگى اسكەردىڭ ءوسىپ كەلە جاتقان ءرولىن ەسەپكە الا وتىرىپ، رەسپۋبليكالىق اسكەري- پاتريوتتىق جيىن وسكەلەڭ ۇرپاقتىڭ بويىندا وتانىمىزدى قورعاۋعا دايىن ەل ازاماتىنىڭ جوعارى پاتريوتتىق سەزىمدەرى مەن ادامگەرشىلىك قاسيەتتەرىن قالىپتاستىرۋعا ىقپال ەتەدى. جيىننىڭ باستى ماقساتى - قازاقستان رەسپۋبليكاسىندا جاستارعا اسكەري- پاتريوتتىق تاربيە بەرۋدى جەتىلدىرۋ، اسكەري قىزمەتتى ناسيحاتتاۋ جانە قازاقستان رەسپۋبليكاسى قارۋلى كۇشتەرىنىڭ بەدەلىن ارتتىرۋ. جيىن بارىسىندا جاستاردى قازاقستاندىق پاتريوتيزم رۋحىندا تاربيەلەۋ، سەنىمدىلىكتى جانە جوعارى ادامگەرشىلىكتى قالىپتاستىرۋ بويىنشا يدەولوگيالىق جۇمىس جۇرگىزىلەتىن بولادى. اسكەري- قولدانبالى سپورت تۇرلەرى مەن جاۋىنگەرلىك دايارلىق پاندەرى بويىنشا جارىستار، اسكەري- دالالىق تاكتيكالىق ويىن، اسكەري تەحنيكا كورمەسى، وڭىرلەردىڭ اسكەري- پاتريوتتىق كلۋبتارىنىڭ، اسكەري- پاتريوتتىق كلۋبتارى دايىنداعان ۇشاق، كەمە ۇلگىلەرى، اسكەري تەحنيكا، اسكەري- پاتريوتتىق كلۋبتارى دايىنداعان اسكەري تەحنيكا، قازاقستاندىق جاۋىنگەرلەر شايقاسقان جەردەن ىزدەۋ توپتارىنىڭ ەكسپوناتتارى، «ايبىن دارىنى» جانە «مەنىڭ روبوتىم» بايقاۋلارى وتەدى. سونداي- اق كونتسەرتتەر ۇيىمداستىرۋ، فيلمدەر كورسەتۋ، الاۋ جانىندا كەش، ينتەراكتيۆتى كونتسەرت، سپورتتىق ويىندار جانە تاعى دا باسقا سول سەكىلدى مادەني- ساۋىق ءىس- شارالارى ۇيىمداستىرىلادى.

سوڭعى جاڭالىقتار