قازاقستاننان مال شىعارۋعا تىيىم سالىنۋى مۇمكىن

None
None
 نۇر-سۇلتان. قازاقپارات - اۋىل شارۋاشىلىعى ءمينيسترى ساپارحان وماروۆ تولدەيتىن مالدى كورشى ەلدەرگە شىعارۋ ماسەلەسىن كوتەردى.

ءمينيستردىڭ ايتۋىنشا، بۇگىندە وتاندىق مالدى شەتەلگە شىعارۋ قارقىنى باسەڭدەمەي وتىر. رەسمي مالىمەتكە سايكەس، بىلتىر 50 مىڭ باس مال وزگە ەلدەرگە شىعارىلدى. ال بيىل بەس ايدىڭ ىشىندە شەتەلگە كەتكەن مالدىڭ سانى 42 مىڭعا جەتكەن.

«ارينە، ءبىر جاعىنان ول جاقسى. دەمەك، اۋىل شارۋاشىلىعى سالاسىنداعى باعدارلامالار جۇمىس ىستەپ تۇر. شارۋالار مالدى ءوسىرىپ، ارى قاراي ساتا الادى. ءبىراق ەكىنشى جاعىنان وسى سالادا ءتارتىپ بۇزۋشىلىقتار دا از ەمەس. شەتەلگە تولدەيتىن مالىمىز كەتىپ جاتىر. ءبىز ول مالدى ەلگە ءوزىمىز اكەلەمىز. وعان قىرۋار قارجى دا ءبولىنىپ تۇرادى. ونداي جاعدايدا تولدەيتىن مالدى كورشى ەلدەرگە شىعارعان دۇرىس ەمەس»، - دەدى وماروۆ ەسەپ بەرۋى كەزدەسۋىندە.

ونىڭ سوزىنە قاراعاندا، وتكەن اپتادا ارنايى ەكى توپ قىتاي مەن وزبەكستان شەكاراسىنا جىبەرىلگەن بولاتىن. قازىرگى كەزدە اتالعان توپتار ءتيىستى تەكسەرىستەردى باستاپ كەتتى.

«الدىن الا مالىمەتكە سايكەس، زاڭ بۇزۋشىلىقتار وتە كوپ. ماسەلەن، مالدىڭ قۇلاعىنداعى بيركانى الىپ تاستايدى. سودان ول مالدىڭ قايدان شىققانىن انىقتاۋ مۇمكىن ەمەس. ءبىز اتالعان تەكسەرىستەر بويىنشا ءتيىستى شارا قابىلدايمىز. ازىرگە تولدەيتىن مالدى شەتەلگە شىعارۋعا تىيىم سالۋ تۋرالى ۇسىنىس بار»، - دەيدى وماروۆ.

ايتا كەتەيىك، بىلتىر يندۋستريالاندىرۋدىڭ ەكىنشى بەسجىلدىعى اياسىندا تۇيە مەن بيە ءسۇتى ەكسپورتقا شىعارىلا باستاعان ەدى. ءسۇتتى ۇنتاق كۇيىندە وندىرەتىن قازاقستانداعى جالعىز كاسىپورىن تۇركىستان وبلىسىندا ورنالاسقان. جوبا قۋاتتىلىعى -  1,5 مىڭ توننا ءسۇت. كاسىپورىن 144 ادامدى جۇمىس ورنىمەن قامتاماسىز ەتىپ وتىر.

 

سوڭعى جاڭالىقتار