ءۇش ءجۇز مىڭ تەڭگە پارا العان اۋديتور ءۇش جارىم جىلعا سوتتالدى

نۇر-سۇلتان. قازاقپارات - اقتوبە وبلىسى بويىنشا ىشكى مەملەكەتتىك اۋديت دەپارتامەنتى باسشىسىنىڭ ورىنباسارى پاراقورلىق قىلمىسى بويىنشا باس بوستاندىعىنان ايىرىلدى، دەپ حابارلايدى قازاقپارات ءتىلشىسى ق ر سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتىنە سىلتەمە جاساپ.

«اقتوبە وبلىسى بويىنشا سىبايلاس جەمقورلىققا قارسى ءىس-قيمىل دەپارتامەنتىنىڭ قىزمەتكەرلەرى بۇدان بۇرىن وبلىستىق ىشكى مەملەكەتتىك اۋديت دەپارتامەنتى باسشىسىنىڭ ورىنباسارى ح. ۇكىبايەۆقا قاتىستى سوتقا دەيىنگى تەرگەۋ امالدارىن اياقتاعان بولاتىن. ۇكىبايەۆ وسى جىلدىڭ ناۋرىز ايىندا ءبىلىم سالاسىنداعى كەشەندى اۋديتتە وڭ قورىتىندى جاساپ بەرگەنى ءۇشىن مۇعالجار اۋداندىق ءبىلىم ءبولىمىنىڭ باسشىسىنان 300 مىڭ تەڭگە پارا العان»، - دەلىنگەن اگەنتتىكتىڭ حابارلاماسىندا.

مۇعالجار اۋداندىق سوتىنىڭ ۇكىمىمەن ح. ۇكىبايەۆ 3 جىل 6 اي مەرزىمگە باس بوستاندىعىنان ايىرىلدى.

سوتتالۋشى مەملەكەتتىك قىزمەتتە جانە جەرگىلىكتى ءوزىن-ءوزى باسقارۋ ورگاندارىندا لاۋازىمدا ەڭبەك ەتۋ قۇقىعىنان ايىرىلدى.