ەۋروپا ليگاسى: قازاقستاندىق كلۋبتاردىڭ قارسىلاستارى بەلگىلى بولدى
اتاپ ايتقاندا، الماتىنىڭ «قايراتى» بوسنيانىڭ «شيروكي بريەگ»، قوستانايدىڭ «توبىلى» ليۋكسەمبۋرگتىڭ «جەنەسس»، شىمكەنتتىڭ «ورداباسى» كلۋبى گرۋزيانىڭ «تورپەدو» (كۋتايسي) كوماندالارىمەن كەزدەسەدى.
«شيروكي بريەگ» كومانداسى 1948-جىلى قۇرىلعان. ءوز ەلىندە 2004، 2006-جىلداردا چەمپيون اتانعان.
ەۋروكۋبوك ويىندارىندا قازاقستاندىق ەكى كوماندامەن كەزدەستى. 2012/2013-جىلداردا ەۋروپا ليگاسى ەكىنشى ىرىكتەۋ كەزەڭىندە پاۆلوداردىڭ «ەرتىس» كومانداسىمەن كەزدەستى.
العاشقى كەزدەسۋدە 2:3 ەسەبىمەن جەڭىلگەن ولار، قارىمتا كەزدەسۋدە 2:0 ەسەبىمەن باسىم ءتۇستى. قوس ويىننىڭ قورىتىندىسىمەن جارىستى جالعاستىرۋعا مۇمكىندىك الدى.
ودان كەيىن، 2017/2018-جىلعى كەزەڭدە ەۋروپا ليگاسى ءبىرىنشى ىرىكتەۋ كەزەڭىندە شىمكەنتتىڭ «ورداباسى» كلۋبىن ءوز الاڭىندا 2:0 ەسەبىمەن جەڭىپ، سىرتتا 0:0 ەسەبىمەن جەڭدى. بۇل جولى دا بوسنيالىق كلۋب جارىستىڭ كەلەسى ساتىسىنا شىقتى.
ليۋكسەمبۋرگتىڭ «جەنەسس» كومانداسىنىڭ قازاقستاندىق كلۋبتارمەن العاش رەت جولى ءتۇيىسىپ وتىر. ەش قالاسىنىڭ نامىسىن قورعايتىن «جەنەسس» 1907-جىلى قۇرىلعان. اتالمىش كلۋب ءوز ەلىنىڭ بىرىنشىلىگىندە 28 مارتە چەمپيوندىق اتاققا قول جەتكىزگەن.
گرۋزيانىڭ «تورپەدو» (كۋتايسي) كومانداسى دا ءبىزدىڭ كلۋبتارعا جاقسى تانىس. اتالمىش ۇجىم 1946-جىلى قۇرىلعان. بۇگىنگى كۇنگە دەيىن ءوز ەلىندە ءتورت مارتە التىننان القا تاقتى. ولار 2012/2013-جىلعى كەزەڭدە ەۋروپا ليگاسى ءبىرىنشى ىرىكتەۋ كەزەڭىندە «اقتوبەمەن» كەزدەستى.
ءوز الاڭىندا 1:1 ەسەبىمەن تەڭ ءتۇسىپ، سىرت الاڭدا 0:1 ەسەبىمەن جول بەردى. جارىستى «اقتوبە» جالعاستىردى. ەۋروپا ليگاسى ءبىرىنشى ىرىكتەۋ كەزەڭىنىڭ العاشقى ويىنى 11- شىلدەدە وتسە، قارىمتا كەزدەسۋ 18- شىلدەدە بولادى.
بۇدان بۇرىن ۋ ە ف ا چەمپيوندار ليگاسى ءبىرىنشى كەزەڭىندەگى نۇر-سۇلتان قالاسىنىڭ «استانا» كومانداسىنىڭ قارسىلاسى انىقتالعانىن حابارلاعان ەدىك.