ءوز ومىرىڭە باعدارلاما جاسا

نۇر-سۇلتان. قازاقپارات - بارلىق زات ويعا بايلانىستى. وي - ءبارىنىڭ باستاماسى. ويمەن باسقارۋعا بولادى. سوندىقتان دا جەتىلدىرۋدىڭ باستى ماسەلەسى: ويمەن جۇمىس جاساۋ. لەۆ تولستوي.

الەمدەگى ەڭ قيىن جانە ەڭ قىمبات كومپيۋتەر نە ەكەنىن بىلەسىز بە؟ ول - ءسىزدىڭ ميىڭىز. ال كەز كەلگەن كومپيۋتەرگە نە كەرەك: باعدارلاما. جاقسى ءومىر - دۇرىس باعدارلاما. باعدارلاما -  بۇل ءسىزدىڭ ارماندارىڭىز نەمەسە «اناۋ جوق، مىناۋ جوق»، «مەنى ەشكىم جاقسى كورمەيدى»، «مەندە جوق»، «مەنى عانا كورمەسە بولدى»، ت. ب. دەگەن «ۇلى» سوزدەرىڭىز.

ەگەر قاجەتتى باعدارلامانى جازساڭىز، ءومىرىڭىز سول باعدارلاما بويىنشا جۇمىس ىستەيتىن بولادى. سول كەزدە سىزگە ەشقانداي پسيحولوگتىڭ دا، بالگەردىڭ دە، كورىپكەلدىڭ دە كەرەگى بولمايدى. قازىرگى كۇنى «ءومىرىمىزدى ەلەستەتە المايتىن» قولىمىزداعى تەلەفوندارىمىز، ءسۇيىپ وقيتىن كىتاپتارىمىز، سان الۋان تەحنولوگيالارىمىزدىڭ ءبارى - بىرەۋدىڭ كىشىگىرىم ويى، ارمانى، ۇلكەن ەڭبەگى ەدى.

جالپى ۇنەمى ارمانداپ ءجۇرۋ كەرەك، ارمانداي ءبىلۋ كەرەك. وعان مىسال رەتىندە، اتاقتى اكتەر دجيم كەرريدىڭ ءومىرىن الۋعا بولادى. 1992 -جىلى كانادادان لوس- اندجەلەسكە كەلگەن جاس، ءالى ەشكىمگە تانىلماعان، كەدەي وتباسىدان شىققان دجيم كەرري، تابىسقا جەتۋ تۋرالى كىتاپتى وقىپ، بىلاي جاساعان ەكەن: ءوزىنىڭ اكتەرلىك قىزمەتى ءۇشىن بەرىلدى دەگەن 10 ميلليون دوللاردىڭ چەگىن قاعازعا جازىپ جانە بۇل چەككە ءۇش جىلدان كەيىن قول جەتكىزەمىن دەپ وزىنە ۋاقىت بەلگىلەپ، قاعازدى ءاميانىنا سالىپ، ۇنەمى وزىمەن بىرگە الىپ جۇرەدى. ءۇش جىلدان كەيىن «تۋپوي ي ەشە تۋپەە» اتتى فيلمىنەن 10 ميلليون دوللار گونورار الادى. ءومىردىڭ ۇلى قۇپياسى -  تارتىلىس زاڭى.

بۇل زاڭ بويىنشا «ۇقساس زاتتار ءبىر-ءبىرىن تارتادى». ياعني، ءسىز ءبىر نارسە تۋرالى ويلاعان كەزدە، سول دۇنيەلەردى ويلارىڭىز سىزگە قاراي تارتاتىن بولادى.

ەكىنشى ۇلى وتان سوعىسى كەزىندە انەستەزيولوگ دارىگەر گەنري بيچەر سولداتتاردى ەمدەپ ءجۇرىپ، ءمورفييى بىتكەن كەزىندە، جەدەل وتا جاساۋ كەرەك بولعاندىقتان، ناۋقاستارعا قاراپايىم تۇز ەرىتىندىسىن سالىپ، ولارعا اۋرۋدى سەزدىرمەيتىن ەڭ مىقتى ءدارىنى سالىپ جاتقانىن ايتادى. دارىگەردىڭ بايقاۋى بويىنشا، سولداتتار وتانى ەش اۋرۋىن سەزبەستەن شىداپ جاتادى. بۇل جەردە ءسوزدىڭ قۇدىرەتى سول - ادامنىڭ ميى مەن بۇكىل اعزاسىن جوق نارسەگە سەندىرۋى، قابىلداتۋى، ادامدى باعدارلاۋى.

ادام بولىپ جاراتىلعاندىقتان ءبارىمىز ارماندايمىز، ارمانداپ كەلەمىز دە. ءبىراق... ورىندالعان ارمان جوق. نەگە؟ سەبەبى، ادام نيەتى مەن ءسوزىن جوندەۋى قاجەت. ءسوز تۇزەلگەن جەردە، وي تۇزەلەدى. وي تۇزەلگەن كەزدە، ءومىر تۇزەلەدى. ءومىر تۇزەلدى دەگەن - ارمانداردىڭ ورىندالعانى دەگەنى.