03:23, 19 - ماۋسىم 2019 | GMT +6
شىمكەنتتە جىلانمەن سۋرەتكە تۇسكەن جاس ءوسپىرىم اۋرۋحانادان ءبىر-اق شىقتى
نۇر - سۇلتان. قازاقپارات - شىمكەنتتە 16 جاستاعى جاس ءوسپىرىم تاۋدا جىلانمەن سۋرەتكە تۇسپەك بولىپ، اۋرۋحانادان ءبىر-اق شىقتى. ونى جىلان شاعىپ العان.
بۇل تۋرالى Otyrar پورتالى حابارلايدى.
زارداپ شەككەن ءجاسوسپىرىمنىڭ سوزىنشە، ول جىلانمەن سۋرەتكە ءتۇسۋ ءۇشىن ونى موينىنا سالىپتى. الايدا وسى كەزدە جىلان قولىن شاعىپ العان. جاس ءوسپىرىم شۇعىل تۇردە اۋرۋحاناعا جەتكىزىلدى.
باسىلىم مالىمەتىنشە، جاز ماۋسىمىنىڭ باسىنان بەرى گيپەرباريكالىق وتتەگىلەۋ ورتالىعىنىڭ توكسيكولوگيا بولىمىنە 9 ادام جەتكىزىلگەن. تۇرعىندار كوبىنە قاراقۇرتتىڭ قۇربانى بولاتىن كورىنەدى.
توكسيكولوگتار تابيعات اياسىندا نەمەسە تاۋدا دەمالعاندا ساق بولۋعا شاقىرادى. جابىق اياق كيىم كيىپ، جىلان نەمەسە باسقا دا ۋلى جاندىكتەر شاعىپ العان جاعدايدا بىردەن دارىگەردىڭ كومەگىنە جۇگىنۋگە كەڭەس بەرەدى.