جاساندى تىرناق ءوسىرۋ: پايداسى مەن زيانى

نۇر-سۇلتان. قازاقپارات - ۇزىن، ادەمى تىرناق - قاشاندا ستيل مەن ءساننىڭ سيمۆولى بولعان. قازىرگى تاڭدا كەز كەلگەن ىسكەر ايەلدى ءساندى مانيكيۋرسىز ەلەستەتۋ قيىن.

سونى بىلگەن ءسان سالوندارى دا قىزىلدى-جاسىلدى جارناماسىمەن كوز بەن سانانى جاۋلاۋدا. مۇمكىن ءدال ءقازىر مىڭداعان ارۋلارىمىز تىرناعىن جاساندى جولمەن وسىرۋگە شەشىم قابىلداي الماي، ويلانىپ وتىرعان بولار.

جاساندى تىرناق وسىرمەس بۇرىن، گەلمەن بە، الدە اكريلمەن بە، قايسىسىمەن وسىرگەن قولايلى ەكەنىن ءبىلىپ العان ءجون.

گەل؟ الدە اكريل؟

تىرناق ارلەۋشى شەبەردىڭ كابينەتىنە كىرسەڭىز بولعانى، تىم قىسقا، كۇتىمسىز تىرناعىڭىز بىرنەشە ساعاتتىق ەڭبەكتەن سوڭ كوركەم بولىپ شىعا كەلەدى.

تىرناقتى گەلمەن جانە اكريلمەن وسىرەدى. بىرەۋىنەن ەكىنشىسى ارتىق دەۋگە كەلمەيدى، ەكۋىنىڭ دە جاقسى جانە جامان جاقتارى بار.

گەل - اللەرگەندى تۇستارى از ماتەريال، سوندىقتان گەل جاعىپ وسىرىلگەن تىرناق ىڭعايلى. الايدا، ول تىرناقتى سىندىرىپ نە زاقىمداپ الساڭىز، بارلىعىن تۇگەلدەي شەشىپ، قايتادان جاساۋ كەرەك.

كوپ ماماندار اكريلمەن جاساندى تىرناق جاساۋدى قولدايدى. ويتكەنى، اكريل بار بولعانى ەشقانداي ىقپالسىز، وزدىگىنەن قاتىپ قالادى جانە قوسىمشا اسپاپتاردى قاجەت ەتپەيدى. وعان قوسىمشا، اكريلدەن جاسالعان تىرناقتى الىپ تاستاۋ اناعۇرلىم وڭاي.

جاساندى تىرناقتىڭ قانداي ماتەريالدان جاسالاتىنىن شەشىپ الساڭىز، ەكى ساعاتتان كەم تۇسپەيتىن «تىرناق ءوسىرۋ» وپەراتسياسىنا دايىن بولىڭىز.

جاساندى تىرناق ءوسىرۋ: پايداسى

ارينە، جاساندى تىرناق ءوسىرۋدىڭ پايدالى اسەرى بولماسا، كوپتەگەن ارۋلار ول ءۇشىن سونشا ۋاقىتى مەن اقشاسىن كەتىرمەس ەدى. گەل جانە اكريلمەن تىرناق ءوسىرۋدىڭ ورتاق جاقسى جاقتارى بار:

- ۇزىن، ادەمى تىرناقتاردىڭ تابيعي تىرناقتان ەش ايىرماشىلىعى بولماي قالادى؛

- ءوز تىرناعىڭىزدىڭ قيسىق- قىڭىر جاقتارىن، بارلىق كەمشىلىكتەرىن جاسىرىپ تۇرادى؛

- ۇزىن تىرناققا كوڭىلىڭىز قالاعان كەز كەلگەن ورنەكتەر مەن سۋرەتتەردى سالا الاسىز؛

- بەتىنە جاققان تىرناق بوياۋى ۇزاق ۋاقىت بۇزىلماي ساقتالادى؛

- ديسكومفورت بولمايدى، جاڭا تىرناققا تەز ۇيرەنىپ كەتەسىز.

جاساندى تىرناق ءوسىرۋ: زيانى

جاساندى تىرناق ءوسىرۋدىڭ پايدالى تۇستارىمەن قاتار، زيانى دا قاتار جۇرەدى:

- جوعارىدا ايتىلعانداي، تىرناق ءوسىرۋ پروتسەسى ۇزاق ۋاقىتتى الادى. ءسىزدىڭ ۋاقىتىڭىز كەتەدى.

- گەلدەن بولسىن، اكريلدەن بولسىن، جاساندى تىرناققا ەكى اپتادا ءبىر ۋاقتىلى كوررەكتسيا جاساپ وتىرۋ كەرەك. ول ءۇشىن تاعى دا ۇزاق ۋاقىت پەن اقشا قاجەت.

- گەلمەن وسىرىلگەن تىرناقتى الىپ تاستاۋعا بولمايدى، ونى تۇگەلدەي ۇگىتۋ كەرەك. ال، ونى تەك تىرناق ارلەۋ شەبەرى عانا ىستەي الادى.

- جاساندى تىرناق وسىرگەننەن كەيىن ءوز تىرناعىڭىز جۇقارىپ، ءالسىز بولىپ قالادى. جاساندى تىرناقتى شەشكەن سوڭ ەرەكشە كۇتىمدى قاجەت ەتەدى.

قانداي جاعدايدا جاساندى تىرناق جاساتۋعا بولمايدى؟

جاساندى تىرناقتى كەز كەلگەن ادام كەز كەلگەن ۋاقىتتا جاساتا الادى. الايدا، مۇلدە قايشى كەلەتىن جاعدايلار دا بار:

- زاقىمدانعان جانە قىشىما اۋرۋى (گريبوك) بار تىرناقتى جاساندى جولمەن وسىرۋگە بولمايدى؛

- تىرناق اينالاسىنداعى ەت (كۋتيكۋلا) زاقىمدانعان جاعدايدا (مىسالى، كەسىپ الساڭىز) جاساندى تىرناق وسىرتپەڭىز. ويتكەنى، جاراعا گەل نە اكريل تۇسسە، اسقىنىپ كەتۋى ابدەن مۇمكىن؛

- جۇرەگى اۋىراتىن، قان تامىرلارى اۋرۋىمەن اۋىراتىن، قانت ديابەتى بار ادامدارعا جاساندى تىرناق وسىرتۋگە بولمايدى؛

- قولى وتە قاتتى تەرلەيتىن ادام جاساندى تىرناقتى مۇلدە ۇمىتقانى ءجون؛

- انتيبيوتيك نەمەسە گورمونالدى دارىلەر قابىلداۋ كەزەڭىندە دە جاساندى تىرناق وسىرتۋگە بولمايدى.

ەگەر سەنىمدى ءارى ءوز ءىسىن جاقسى بىلەتىن مامان كەزدەسسە، ەش قورىقپاستان جاساندى جولمەن تىرناق وسىرتۋگە قورىقپاڭىز.

دەرەككوزى: ​aikarakoz.kz