ون جىلدان بەرى قينالىپ كەلگەن ءايشابيبى جىلت ەتكەن جارىقتى كورگىسى كەلەدى
ءايشابيبى التى جاسىندا ويناپ ءجۇرىپ قۇلاپ قالعان. ءۇش جىلدان كەيىن قىزدىڭ كوزى كورمەي قالادى. دارىگەرلەر قىزدىڭ كوزىنىڭ كورمەي قالۋىنا باسىنداعى ىسىك اسەر ەتكەن دەپ وتىر. ءايشابيبى كوزىنە وتا جاساتىپ، جارىق دۇنيەنى كورۋدى ارماندايدى. ونىڭ كوزىنە ەلىمىزدە وتا جاساي المايدى ەكەن.
"كوزىم كورمەگەنىنە قاپالانامىن، ءوزىم ءجۇرىپ، ءوزىم كورگىم كەلەدى. ءوز تىرشىلىگىمدى ءوزىم ىستەگىم كەلەدى. ميىمداعى ىسىك كوزدىڭ قان تامىرىن قىسىپ قالعان. جايلاپ كوزىم كورمەيتىن بولدى. اتا- انام اجىراسىپ كەتكەن. ارتىنشا انام قايتىس بولدى. قازىر اكەم كومەكتەسىپ تۇرادى. ءارىپ تانيمىن، جوعارعى سىنىپتى وقي المادىم"، - دەيدى ءايشابيبى جۇماباي.
قىزدىڭ 10 جىلدان بەرى كوزى كورمەيدى. كۇن ىسىسا بولدى، باسىنىڭ اۋىراتىنى تاعى بار. قۇلاپ قالعاننان كەيىن دارىگەرگە قارالماعان. بۇل جايلى قىزدىڭ اتاسى ايتىپ بەردى.
"شەتەلگە بارۋعا جاعداي جوق. تاشكەنتتەگى دارىگەرلەر اكەل وتا جاسايمىز، ءبىراق كەپىلدىك بەرە المايمىز دەيدى. كوڭىلدە كۇدىك بولىپ، وعان بارۋعا جۇرەكسىندىك. ءبىر ەمەس، ەكى رەت باردىم. وتا جاسايمىز 12 ميلليون سوم سۇراپ وتىر. قىزدان ايىرىلىپ قالام با دەپ قورقادى. التى جاسىندا مەنىڭ قولىما بارعان. اناسى بوسانعاننان كەيىن، سەگىز ايلىق بالاسىمەن ەس- ءتۇسسىز اۋرۋحاناعا تۇسەدى. سودان كەيىن قىزداردى الىپ كەتكەنمىن. ءۇشىنشى سىنىپ وقىپ جۇرگەندە "اتا مەنىڭ كوزىم كورمەيدى، جازۋلاردى كورمەيمىن، ارىققا ءتۇسىپ كەتتىم" دەدى. سودان بالالار دارىگەرىنە باردىم. اناليز الماستان ۆيتامين سالىپ تاستاعان. ۆيتامين ەسكى اۋرۋدى قوزدىرادى ەكەن. ءسويتتى دە، ىسىك ۇلكەيىپ، كوزدىڭ تامىرىن قىسىپ قالادى"، - دەيدى ءايشابيبىنىڭ اتاسى زامانبەك زيايەۆ.