بۇگىن فۋتبولدان ەۋروكۋبوك ويىندارىنىڭ جەرەبەسى تارتىلادى

نۇر-سۇلتان. قازاقپارات - بۇگىن فۋتبولدان ۋەفا چەمپيوندار ليگاسى مەن ەۋروپا ليگاسى ويىندارىنىڭ جەرەبەسى تارتىلادى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەلىك، بيىل ەۋروكۋبوك ويىندارىندا ەلىمىزدىڭ اتىنان ءتورت كوماندا سىنعا تۇسەدى. چەمپيوندار ليگاسىندا نۇر-سۇلتان قالاسىنىڭ «استانا» كومانداسى ەل نامىسىن قورعايدى. ال ەۋروپا ليگاسىندا الماتىنىڭ «قايرات»، شىمكەنتتىڭ «ورداباسى» جانە قوستانايدىڭ «توبىل» كوماندالارى جاسىل الاڭعا شىعادى.

«استانا» ءوز ويىندارىن ءبىرىنشى ىرىكتەۋ كەزەڭىنەن باستايدى. ەلوردالىق كلۋبقا قارسىلاس بولۋى مۇمكىن بەس كوماندا بەلگىلى بولىپ وتىر. ولاردىڭ قاتارىندا ليتۆانىڭ «سۋدۋۆا»، رۋمىنيانىڭ چ ف ر كلۋج، ۆەنگريانىڭ «فەرەنتسۆاروش»، ەستونيانىڭ «نەممە كاليۋ» جانە ارمەنيانىڭ «ارارات-ارمەنيا» كوماندالارى بار.

ءبىرىنشى ىرىكتەۋ كەزەڭىنىڭ العاشقى ويىندارى 9-10- شىلدە كۇندەرى بولسا، قارىمتا كەزدەسۋ 16-17- شىلدەدە وتكىزىلەدى.

ايتا كەتەلىك، «استانا» ءبىزدىڭ ەلىمىزدىڭ اتىنان بەسىنشى جىل قاتارىنان چەمپيوندار ليگاسىنىڭ ىرىكتەۋ كەزەڭىندە سىنعا ءتۇسىپ كەلەدى. ماسەلەن، 2015/2016-جىلعى كەزەڭدە اتالمىش تۋرنيردىڭ توپتىق كەزەڭىنە دەيىن جەتتى. ودان كەيىنگى ءۇش جىلدا ەكى مارتە ءۇشىنشى ىرىكتەۋ كەزەڭىنەن اسا الماسا، ءبىر مارتە پلەي-وفف كەزەڭىنە دەيىن باردى.

ناتيجەسىندە ولارعا سوڭعى ءۇش جىلدا ەۋروپا ليگاسىنىڭ ىرىكتەۋ كەزەڭىنە قاتىسۋعا مۇمكىندىك بەرىلدى. ودان سۇرىنبەي وتكەن ەلوردالىقتار توپتىق كەزەڭىندە ەل نامىسىن قورعادى.

ال 2016/2017-جىلعى كەزەڭدە جارىستىڭ 1/16 فينالىنا دەيىن جەتتى. «قايرات» 2005/2006-جىلعى كەزەڭدە چەمپيوندار ليگاسى ءبىرىنشى ىرىكتەۋ كەزەڭىنەن اسا الماسا، ەۋروپا ليگاسىنا بيىل سەگىزىنشى مارتە قاتىسادى. «ورداباسى» كومانداسى ۋەفا ەۋروپا ليگاسىندا تۇڭعىش رەت 2012/2013-جىلداردا سىنعا تۇسسە، 2015-جىلدان باستاپ اتالمىش تۋرنيرگە قاتارىنان ءۇش مارتە قاتىستى.

2017-جىلى ەل بىرىنشىلىگىندە ءۇشىنشى ورىن العان ەدى. دەگەنمەن بىلتىر اتالمىش تۋرنيرگە قاتىسۋ مۇمكىندىگىنەن شەت قالىپ قويدى. ورنىنا قوستانايدىڭ «توبىل» كومانداسى قاتىستى.

قوستانايدىڭ «توبىلى» ەۋروپا ليگاسىندا جەتىنشى مارتە باق سىنايدى.

ايتا كەتەرلىگى، «توبىل» 2011/2012-جىلعى كەزەڭدە چەمپيوندار ليگاسىنىڭ ەكىنشى ىرىكتەۋ كەزەڭىنەن ارىگە اسا العان جوق. بيىلعى ەۋروپا ليگاسى ءبىرىنشى ىرىكتەۋ كەزەڭىنىڭ ويىندارى 11- جانە 18- شىلدە كۇندەرى وتكىزىلەدى. ەستەرىڭىزگە سالا كەتەلىك، جەرەبە تارتۋ ءراسىمى بۇگىن نۇر-سۇلتان ۋاقىتىمەن ساعات 18:30 دا باستالادى.