قازاقستان قاي ەلدەرگە تاعام ەكسپورتتايدى؟

نۇر-سۇلتان. قازاقپارات - قازاقستاننىڭ اۋىل شارۋاشىلىعى ونىمدەرىن شەت ەلدەرگە ەكسپورتتاۋ كولەمى ارتىپ كەلەدى، دەپ حابارلايدى قازاقپارات ءتىلشىسى.

بۇل تۋرالى ق ر اۋىل شارۋاشىلىعى ءمينيسترى ساپارحان وماروۆ حالىققا ەسەپ بەرۋ كەزدەسۋىندە ايتىپ بەردى.

«بۇگىندە 13 تاۋار ءتۇرى بويىنشا قىتاي نارىعى اشىق. ياعني، بالىق ونىمدەرى، اسىل تۇقىمدى جىلقىلار، مۇزداتىلعان قوي ەتى، بال، ءبيداي، ءبيداي كەبەگى، سويا بۇرشاقتارى، سويىس جىلقىلارى، راپس، سيىر ەتى، جوڭىشقا پىشەنى، ۇن، وسىمدىك مايى، ارپا، جۇگەرى ەكسپورتتالادى»، - دەدى مينيستر قازمەديا ورتالىعىندا حالىققا ەسەپ بەرۋ كەزدەسۋىندە.

ال يران تاراپىمەن ءتىرى قويلاردى، مۇزداتىلعان جانە سالقىنداتىلعان قوي ەتىن، سيىر ەتىن، جۇمىرتقا جەتكىزۋگە ارنالعان ۆەتەريناريالىق تالاپتار كەلىسىلگەن.

«ساۋد ارابياسى كورولدىگىمەن سويۋ جانە ءوسىرۋ ءۇشىن وتاندىق ءىرى قارا مال مەن ۇساق مال ەكسپورتتاۋعا ارنالعان ۆەتەريناريالىق سەرتيفيكات كەلىسىلدى. باحرەينگە سيىر ەتى مەن قوي ەتىن ەكسپورتتاۋ جۇزەگە اسىرىلۋدا. ناتيجەسىندە اگروونەركاسىپتىك كەشەن ونىمدەرىن قىتايعا ەكسپورتتاۋ %30,4 عا (جالپى ەكسپورت - 258,2 ميلليون ا ق ش دوللارى)، پارسى شىعاناعى ەلدەرىنە (كاتار، كۋۆەيت، ب ا ءا، س ا ك، ومان، باحرەين) ەكسپورتتاۋ 4,1 ەسەگە، يرانعا ەكسپورتتاۋ 2,1 ەسەگە (328,9 ميلليون ا ق ش دوللارى)، ەۋرووداققا ەكسپورتتاۋ %14,6 عا (303,6 ميلليون ا ق ش دوللارى) ارتتى»، - دەيدى مينيستر.

جالپى اگروونەركاسىپتىك كەشەن ونىمدەرىن ەكسپورتتاۋ كولەمى 2018-جىلى %24,5 عا ۇلعايعان.

«اگروونەركاسىپتىك كەشەن ونىمدەرىنىڭ شەتەلدىك نارىقتارعا قولجەتىمدىلىگىن ارتتىرۋ ءۇشىن يزرايل، تۇركيا، كۋۆەيت، ومان، جاپونيا، وڭتۇستىك كورەيا مەملەكەتتەرىمەن، ەۋرووداق ەلدەرىمەن كەلىسسوزدەر جۇرگىزۋ جوسپارلانىپ وتىر. بۇل رەتتە، قىتاي تاراپىمەن 2018-جىلى قازاقستاننان جەتكىزىلەتىن ەكسپورتقا باعدارلانعان اۋىل شارۋاشىلىعى ونىمدەرىنە قويىلاتىن يمپورتتىق تالاپتاردى كەلىسۋ جونىندەگى جول كارتاسى بەكىتىلدى»، - دەپ ءوز ءسوزىن تۇيىندەدى س. وماروۆ.