شەنەۋنىكتەردىڭ ءىس- ساپارلارى جايىندا: ەڭ جاقسى مەيرامحانا، قىمبات سىيلىقتار، مونشا جانە اڭعا شىعۋ
قىمبات قوناق ءۇي، استاتوك داستارحان، ىسىراپقا تولى اڭعا شىعۋ. اگەنتتىك ءتوراعاسى ءوزىنىڭ facebook - تەگى پاراقشاسىندا ەلىمىزدىڭ بارلىق وڭىرىندە جوعارىدان كەلگەن باسشىنى وسىلاي كۇتىپ الۋ ادەتكە اينالىپ بارا جاتقانىن سىنعا الدى.
«ءوزىمنىڭ جاڭا سالاداعى العاشقى پوستىمدا مەملەكەتتىك اپپاراتتاعى كەلەڭسىز قۇبىلىستاردىڭ ءبىرى - ەل ىشىندەگى ءىسساپارلار بارىسىنداعى قىزمەتشىلەردىڭ تەرىس قىلىقتارى جانە وتىرىس، الىم- سالىق، داستارحان جايۋ جانە تارتۋ جاساۋ قوسا جۇرەتىن تامىر جايعان، تومەن قۇرىلىمداردى جاپپاي تەكسەرۋلەرگە نازار اۋدارتقىم كەلەدى. بۇل پروبلەمانىڭ وتكىرلىگى، اسىرەسە وبلىستىق، اۋداندىق جانە اۋىلدىق دەڭگەيدەگى مەملەكەتتىك قىزمەتشىلەردىڭ كوپتەگەن شاعىمدارىمەن راستالادى»، - دەپ جازدى اليەك شپەكبايەۆ.
اگەنتتىك باسشىسى مۇنداي باسسىزدىقتاردى ازايتۋ ءۇشىن تەكسەرۋلەردى قاشىقتىقتان باقىلاۋمەن اۋىستىرۋعا بولاتىنىن ايتادى.
«ءبىز ستاندارتتارىنا بوي تۇزەيتىن ە ى د ۇ ەلدەرىندە مۇنداي ماسەلە جوق، ەشكىم ەشكىمدى قابىلدامايدى، ال تەكسەرۋلەر قاشىقتىقتان باقىلاۋ ەسەبىنەن جۇزەگە اسىرىلادى. ءاربىر ءىسساپار ءۇشىن تەكسەرۋشىلەرگە لوگيستيكا، تۇرۋ جانە تاماقتانۋ شىعىندارىن جاباتىن جەتكىلىكتى قاراجات بولىنەدى. الايدا، تەكسەرۋشىلەر وڭىرلەرگە جول جۇرگەندە، بولىنگەن قاراجاتتىڭ تيىنىن دا جۇمساماۋعا ايلا تابادى. باقىلاۋشىلاردىڭ تابەتىن بىلە تۇرا، جەرگىلىكتى باسشىلار باسشىلىقتى «ءتيىستى دەڭگەيدە» قارسى الۋ ءۇشىن بيزنەسمەندەرگە كومەك سۇراپ جۇگىنەدى. مۇنداي كومەك ەشقاشان تەگىن بولمايدى جانە ءارى قاراي شەنەۋنىك تاراپىنان ەرەكشە قامقورلىققا اينالادى. مۇنىڭ ءبارى قالاي اياقتالاتىنىن ەسكە سالۋدىڭ قاجەتى جوق دەپ ويلايمىن»، - دەيدى اليك شپەكبايەۆ.
جەمقورلىقق باستايتىن مۇنداي ارەكەتتەردى ادامداردىڭ ۇلتتىق داستۇرگە تەلۋى ادىلەتسىز ەكەنىن ايتادى اگەنتتىك ءتوراعاسى.
«بۇل رەتتە وسىنداي مىنەز- قۇلىقتى ۇلتتىق ءداستۇر مەن شەنگە باس ۇرۋشىلىق، باسشىلىققا كورسەتىلگەن قۇرمەت تانىتۋ ارقىلى اقتاۋعا تىرىساتىن ادامدار بار ەكەنى تاڭعالدىرادى. مەنىڭ ۇستانىمىم، بىرەگەي- كاسىبي جانە يننوۆاتسيالىق مەملەكەتتىك اپپارات ءۇشىن بۇل مۇلدەم قولايسىز. بۇل تاجىريبە مەملەكەتتىك قىزمەتتىڭ نەگىز قالاۋشى قاعيدالارىنىڭ بەدەلىن تۇسىرەدى جانە قۇنسىزداندىرادى، سونداي- اق سىبايلاس جەمقورلىق قارقىنىن جىلدامداتادى. وسىعان بايلانىستى وڭىرلىك ءىسساپارلارعا، ءتۇرلى كونفەرەنسيالار مەن سەمينارلارعا شىعاتىن بارلىق مەملەكەتتىك قىزمەتشىلەرگە، قۇقىق قورعاۋ جانە سوت ورگاندارىنىڭ قىزمەتكەرلەرىنە، مەملەكەتتىك كاسىپورىندار مەن ۇلتتىق كومپانيالاردىڭ باسشىلارىنا ايتارىم: جوعارىدا ايتىلعان بارلىق تاجىريبە جۇمىستان بوساتۋدان باس بوستاندىعىنان ايىرۋدىڭ ناقتى مەرزىمىنە دەيىن قاتاڭ سانكسيالار كوزدەلگەن ورەسكەل بۇزۋشىلىق بولىپ تابىلادى. سول سياقتى قابىلداۋشى تاراپقا دا قاتىستى»، - دەپ جازدى ول.
بۇل ماسەلەنى جۇيەلى باقىلاۋعا العانىن ەسكەرتكەن اليك شپەكبايەۆ ۇكىمەتكە كوشپەلى تەكسەرۋلەردى قاشىقتىقتان مونيتورينگتەۋ ارقىلى وڭتايلاندىرۋ ۇسىنىنلعانىن ايتادى.
«بۇل جۇمىستى ساپالى جۇزەگە اسىرۋدا ازاماتتىق قوعام ينستيتۋتتارى ماڭىزدى ءرول اتقارادى. بارلىق قوعام بەلسەندىلەرى مەن نەمقۇرايلى قارامايتىن ازاماتتاردى وسىنداي فاكتىلەرگە مۇقيات نازار اۋدارا وتىرىپ، ءبىزدى كەز- كەلگەن ىڭعايلى تاسىلمەن: مەنىڭ پوشتاما جازباشا تۇردە جۇگىنۋ [email protected] الەۋمەتتىك جەلىلەردە حابارلاۋمەن نەمەسە اگەنتتىكتىڭ 1424 كولل- ورتالىعىنا قوڭىراۋ شالىپ، حاباردار ەتۋگە شاقىرامىن»، - دەدى اگەنتتىك باسشىسى.
ەسكە سالساق، جاقىندا عانا اليك شپەكبايەۆ سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى بولىپ تاعايىندالدى.
اۆتور: ەسىمجان ناقتىباي