توقايەۆ: مەملەكەتتىك كۇزەت قىزمەتى - توتەنشە ماڭىزدى ۇيىم
قازاقستان پرەزيدەنتى جەكە قۇرامعا مەملەكەتتىك كۇزەت قىزمەتىنىڭ جاڭادان تاعايىندالعان باستىعى ءانۋار سادىقۇلوۆتى تانىستىردى.
قاسىم- جومارت توقايەۆ قازاقستاننىڭ مەملەكەتتىك كۇزەت جۇيەسىن دامىتۋدىڭ نەگىزگى باعىتتارى تۋرالى كۇزەت قىزمەتى باسشىسىنىڭ بايانداماسىن تىڭدادى.
«مەملەكەتتىك كۇزەت قىزمەتى - توتەنشە ماڭىزدى ۇيىم. سىزدەر قىزمەت اتقارۋ بارىسىندا وسىنى قاپەردە ۇستاڭىزدار. مەملەكەتتىك كۇزەت قىزمەتىنە ايرىقشا مىندەتتەر جۇكتەلەدى. سوندىقتان، مەملەكەتتىك كۇزەت ماسەلەسى ءارقاشان باستى نازاردا بولادى. تاپسىرىلعان ىسكە بارىنشا ادالدىق تانىتىپ، جوعارى كاسىبي دايىندىقتارىڭىزدى كورسەتەتىندەرىڭىزگە سەنىمدىمىن»، - دەدى مەملەكەت باسشىسى.
قازاقستان پرەزيدەنتى ىشكى جانە سىرتقى قاۋىپ- قاتەردىڭ قۇبىلمالى جاعدايىندا كۇزەت قىزمەتكەرلەرىنىڭ كاسىبيلىگىنە قويىلاتىن تالاپ وتە جوعارى بولاتىنىن اتاپ ءوتىپ، قىزمەتكە كاسىبي، يدەولوگيالىق جانە زياتكەرلىك تۇرعىدان دايىن جاس جىگىتتەر ىرىكتەپ الىناتىنىن ايتتى.
«مەملەكەتتىك كۇزەت قىزمەتىنىڭ وفيتسەرلەرىندە كەلىسسوزدەر جۇرگىزۋگە قاجەتتى ديپلوماتيالىق داعدىلارعا سايكەس كەلەتىن اسكەري بىلىكتىلىك، قىراعىلىق، اقپاراتتى قورىتا ءبىلۋ سياقتى ساپالىق قاسيەتتەر بولۋى ءتيىس. سونىمەن قاتار، ىشكى جانە سىرتقى ساياساتتى تۇسىنەتىن جانە بىلەتىن ساياسي ءبىلىمى جەتىك بولۋى قاجەت»، - دەدى مەملەكەت باسشىسى.
قاسىم- جومارت توقايەۆ شۇعىل ارەكەت ەتۋ شتابىنىڭ جۇمىسىمەن تانىسىپ، مەملەكەتتىك كۇزەت قىزمەتىنىڭ جۇمىس كابينەتتەرىن ارالاپ كوردى. سونداي- اق، كۇزەت قىزمەتىنىڭ جۇمىسىن ودان ءارى جەتىلدىرۋ جونىندە ءبىرقاتار تاپسىرما بەردى.