بالقاش، ۇلىتاۋ، قارقارالى - قاراعاندى وبلىسىندا تۋريزم دامىتىلاتىن ايماقتار

قاراعاندى. قازاقپارات - قاراعاندى وبلىسىندا تۋريزم دامىتىلاتىن ءۇش باعىتى انىقتالدى.

بۇل، تۋريستىك كارتانىڭ توپ-10 نىساندارىنا ەنگەن بالقاش كۋرورتتىق ايماعى،  ۇلىتاۋ تاريحي- مادەني ورتالىعى جانە قارقارالى اۋدانىنىڭ كۋرورتتىق ايماعى، دەپ حابارلايدى قازاقپارات ءتىلشىسى.

بالقاش قالاسىندا وتكەن فورۋمدا تۋريستىك يندۋستريانى دامىتۋ، شەتەلدىكتەرگە ەلىمىزدىڭ كورىكتى جەرلەرىن كورسەتۋ جانە ىشكى ءتۋريزمدى تارتىمدى ەتۋ ماسەلەلەرى تالقىلاندى.

«بۇل فورۋمدى وڭىردەگى تۋريزمدى دامىتۋدىڭ نەگىزگى نۇكتەسى بولىپ تابىلاتىن - بالقاش ماڭىندا وتكىزۋ تۋرالى شەشىم قابىلدادىق. قازىرگى تاڭدا ستاتيستيكا كەلەسىدەي: وبلىستا قوناق ۇيلەر، دەمالىس ايماقتارى مەن ۇيلەر، جازعى لاگەرلەر، پانسيوناتتار جانە باسقا 253 نىسان دەمالىستى ۇيىمداستىرۋ بويىنشا قىزمەت كورسەتەدى. ولار جىلىنا 280 مىڭنان استام ادامدى قابىلدايدى. ءبىز جىل سايىن تۋريستىك نۇكتەلەرىمىز ميلليون تۋريستى قابىلدايتىنداي دەڭگەيگە جەتۋدى ماقسات ەتىپ وتىرمىز. ال ەگەر ول كورسەتكىش وسى دەڭگەيدەن اسىپ تۇسەر بولسا، بۇل شىن مانىندە، تابىستى بولادى دەپ ويلايمىن»، - دەدى قاراعاندى وبلىسى اكىمىنىڭ ورىنباسارى الماس ايداروۆ ايماقتىق تۋريستىك فورۋمنىڭ پلەنارلىق وتىرىسىندا.

ونىڭ ايتۋىنشا، باي تاريحي-مادەني مۇرامىز، كيەلى ورىنداردىڭ بولۋى، وبلىستىڭ گەوگرافيالىق ورنالاسۋى، سونداي-اق كوپتەگەن بىرەگەي ساۋلەت ەسكەرتكىشتەرى بەلسەندى تۋريزمنىڭ، ساۋىقتىرۋ، ەتنوگرافيالىق جانە ەكولوگيالىق دەمالىستىڭ بارلىق تۇرلەرىن دامىتۋعا ۇلكەن مۇمكىندىكتەر اشادى.

بالقاش كۋرورتتىق ايماعىن دامىتۋ بويىنشا باس جوسپاردى McKensey كونسالتينگتىك كومپانياسى ازىرلەدى. دەمالىس ايماعىنىڭ قۇرامىنا بالقاش، اقتوعاي اۋدانىنىڭ توراڭعالىق جانە شۇبار-تۇبەك كەنتتەرى جانە پريوزەرسك قالاسى كىرەدى.

بالقاش جاعالاۋىندا 53 قوناق ءۇي مەن دەمالىس ورنى ورنالاسقان. بالحاش ماڭىندا جىل سايىن جاعاجاي دەمالىسىنا شامامەن 80 مىڭ ادام كەلەدى. وبلىستىق كاسىپكەرلىك باسقارماسىنىڭ باسشىسى تاتيانا ابلايەۆانىڭ ايتۋىنشا، 2030-جىلعا قاراي تۋريستىك اعىندى 4 ەسەگە ارتتىرۋ الەۋەتى بار.

ول كۋرورتتىق ايماق اۋماعىندا ينفراقۇرىلىمدى دامىتۋ جوبالارى تۋرالى توقتالا كەتتى. مەملەكەتتىك قولداۋ ارقىلى ەلەكتر جەلىلەرىن، سۋ قۇبىرلارىن سالۋ، جاعاجاي ايماقتارى مەن جاعالاۋلاردى جايلاستىرۋ جوسپارلانۋدا. فورۋم قاتىسۋشىلارىنا 2019-2025-جىلدارعا ارنالعان تۋريستىك سالانى دامىتۋدىڭ مەملەكەتتىك باعدارلاماسى تانىستىرىلدى.

بۇل قۇجات بيىلعى 30- مامىردا بەكىتىلدى. ەل پرەمەر-ءمينيسترىنىڭ تاپسىرماسى بويىنشا باعدارلامانى ىسكە اسىرۋ ءۇشىن جوبالىق كەڭسە دە قۇرىلدى. تۋريستىك سالانى دامىتۋداعى جاڭالىقتار مەن مەملەكەتتىك قولداۋدىڭ باستى شارالارى تۋرالى «Kazakh Tourism»  ۇلتتىق كومپانياسى» ا ق باسقارما ءتوراعاسىنىڭ كەڭەسشىسى ەركەبۇلان حاسەنوۆ باياندادى.

ال نۇر-سۇلتان قالاسىنداعى تۋرفيرما جەتەكشىسى تاتيانا ۆەرنيتسكايانىڭ سوزىنشە، تۋريستەردى حالىقتىڭ سالت- ءداستۇرى، تاريحى قىزىقتىرادى.

«ىشكى تۋريزم ماسەلەسى باستى نازاردا بولدى. بۇل سالادا ءبىز كوپ جىلدان بەرى جۇمىس ىستەپ كەلەمىز، شەتەلدىك تۋريستەر ءۇشىن تۋرلار قۇرامىز. بىزدە بىرەگەي تاريح جانە تابيعاتى اسەم جەرلەر بار. شەت مەملەكەت تۋريستەرىنە كورسەتىپ، ماقتان تۇتارلىق مەكەندەر دە جەتەرلىك. حالقىمىزدىڭ تۇرمىسى، ءومىر سالتى، ۇلتتىق تاعام - وسىنىڭ بارلىعى شەتەلدىكتەرگە قىزىقتى جانە ولار قازاقستانعا تۋريست رەتىندە كەلگىسى كەلەدى. ءبىراق وسىنىڭ ءبارىن كورسەتۋ جانە لايىقتى ۇسىنۋ ءۇشىن تىرىسۋ كەرەك. شەشىلۋى ءتيىس ماسەلەلەر ءالى دە جەتكىلىكتى: جولدىڭ ناشار بولۋى، قالىپتى دارەتحانالاردىڭ بولماۋى، كاسىبي گيدتەردىڭ جەتىسپەۋشىلىگى. قوعام ءوسىپ كەلەدى، قازاقستاندىقتار الەم بويىنشا كوپ جۇرەدى جانە شەتەلدەگىدەي دەمالۋ ءۇشىن جاقسى جاعداي جاساۋدى قالايدى»، - دەدى ول.

ونىڭ ايتۋىنشا، اقپاراتتىق تۋر كەزىندە بالقاش ماڭىن ارالاي كەلە، تۋروپەراتورلار اقتوعاي اۋدانىندا ەرەكشە اسەرگە يە بولعان.

سەبەبى وندا قوناقتاردى يمپروۆيزاتسيالانعان اۋىلدا قارسى الىپ، قازاق مادەنيەتى مەن اس ءۇيىن كورسەتتى.

بۇل ەتنوتۋريزمدى دامىتۋعا ارنالعان ناعىز قازىنا. وتاندىق تۋريزمدى دامىتۋعا اتسالىساتىن تۋريستىك فيرمالاردىڭ وكىلدەرى بالقاش - تەك جاعاجايلىق دەمالىس قانا ەمەس ەكەنىنە سەنىمدى.

ولار تۋريستەردى تارتۋدىڭ بىرنەشە جولدارىن ۇسىنادى. بۇل ءۇشىن باعدارلاما قۇرىپ، جاعداي جاساۋ كەرەك، دەپ اتاپ ءوتتى فورۋمعا قاتىسۋشىلار.