ايگىلى «فورساج» فيلمىنىڭ ەپيزودى قازاقستاندا ءتۇسىرىلۋى مۇمكىن

None
None
نۇر-سۇلتان. قازاقپارات - ايگىلى «فورساج» فيلمىنىڭ پروديۋسەرى نۇر-سۇلتان قالاسىنان فيلمگە ارنالعان لوكاتسيا قاراستىرۋدا، دەپ حابارلايدى قازاقپارات ءتىلشىسى.

«Universal Pictures كينوكومپانياسىنىڭ وكىلدەرى قازاقستانعا كەلىپ، فيلمنىڭ ەپيزودىن تۇسىرۋگە ارنالعان لوكاتسيامەن تانىستى. ارينە فيلمدى ءتۇسىرۋ تۇسىرمەۋدى پروديۋسەرلەرى شەشەدى. دەگەنمەن «فورساج» فيلمى بولماعان جاعدايدا باسقا جوبالاردى ىسكە اسىرۋ جوسپاردا بار»، - دەدى «جاھاندىق ساياسات باستامالارى» كومپانياسىنىڭ پرەزيدەنتى دجەي فيتلۋك ق ر مادەنيەت جانە سپورت مينيسترلىگىندە وتكەن باسپا ءسوز ءماسليحاتىندا.

سونداي-اق، كومپانيا باسشىسى امەريكاندىق كينوكومپانيالاردىڭ ءوز قاراجاتتارى مەن مۇمكىندىكتەرىن ساياسي تۇراقتى ەلدەرگە باعىتتايتىنىن ايتىپ ءوتتى.

«قازاقستان بۇل باعىتتا قاۋىپسىز ەل. سونىمەن قاتار سىزدەردىڭ ەلدەرىڭىزدە قايتالانباس لاندشافتتار، ينفراقۇرىلىم جانە جەرگىلىكتى كاسىبي ماماندار بار. وسى تۇرعىدا قازاقستاندىق كينو سالاسى ماماندارىمەن بىرلەسىپ بىرنەشە كينوتۋىندىلاردى جاساپ شىعاراتىنىمىزعا سەنىم ارتامىن»، - دەدى ول.

ءوز كەزەگىندە ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى اندرەي حازبۋلاتوۆ «فورساج» فيلمىنىڭ تۇسىرىلىمىنە قاتىستى ءوز پىكىرىن ءبىلدىردى.

«فيلم اۆتورلارىن ەلورداداعى جارىس اۆتوموبيلدەرىنە ارنالعان الاڭ قىزىقتىردى. ول بويىنشا قازىرگى ۋاقىتتا كەلىسىم جاسالۋ ۇستىندە، ءبىراق تولىقتاي قۇجاتتار راسىمدەلگەن جوق»، - دەدى ا. حازبۋلاتوۆ.

سوڭعى جاڭالىقتار