اسقار مامين ءبىلىم مينيسترلىگىنىڭ ۇجىمىنا جاڭا باسشىنى تانىستىردى

None
None
نۇر- سۇلتان. قازاقپارات - ق ر پرەمەر- ءمينيسترى اسقار مامين ءبىلىم جانە عىلىم مينيسترلىگىنىڭ ۇجىمىنا ۆەدومستۆونىڭ جاڭا باسشىسى اسحات ايماعامبەتوۆتى تانىستىردى، دەپ حابارلايدى قازاقپارات primeminister.kz سايتىنا سىلتەمە جاساپ.

 پرەزيدەنت جارلىعىمەن كۇلاش ءشامشيدينوۆا باسقا جۇمىسقا اۋىسۋىنا بايلانىستى ق ر ءبىلىم جانە عىلىم ءمينيسترى لاۋازىمىنان بوساتىلعان بولاتىن. اسقار مامين وعان جەمىستى جۇمىسى ءۇشىن العىس ءبىلدىرىپ، جاڭا ورىندا ساتتىلىك تىلەدى. «كۇلاش نوعاتاي قىزى تاجىريبەسى مول باسشى. مينيستر قىزمەتىندە قارقىندى جۇمىس ىستەپ، ەلىمىزدىڭ ءبىلىم بەرۋ سالاسىنىڭ دامۋىنا ەلەۋلى ۇلەس قوستى» ، - دەدى پرەمەر- مينيستر. ا. مامين مينيسترلىكتىڭ ۇجىمىنا جاڭا باسشىنى تانىستىرا وتىرىپ، اسحات ايماعامبەتوۆتىڭ بۇل سالادا ءتيىستى ءبىلىمى مەن ۇلكەن تاجىريبەسى بار ەكەنىن اتاپ ءوتتى.

اسحات ايماعامبەتوۆ ءتۇرلى جىلدارى قاراعاندى وبلىسىنىڭ ءبىلىم باسقارماسىنىڭ باسشىسى، ءبىلىم جانە عىلىم ۆيتسە- ءمينيسترى قىزمەتتەرىن اتقاردى، قاراعاندى وبلىسى اكىمىنىڭ ورىنباسارى بولدى. پرەمەر- مينيستر ءبىلىم جانە عىلىم مينيسترلىگىنىڭ الدىندا اۋقىمدى مىندەتتەر تۇرعانىن اتاپ ءوتتى. بۇل - مەكتەپكە دەيىنگى، ورتا، كاسىپتىك- تەحنيكالىق جانە جوعارى ءبىلىمدى جاڭعىرتۋ، سۇرانىسقا يە زاماناۋي ماماندار دايارلاۋ، ءبىلىم جانە عىلىمنىڭ ساپالى جۇيەسىن دامىتۋ.

سوڭعى جاڭالىقتار