ايگىلى «ەرتۇعىرىل» فيلمىنىڭ رەجيسسەرى قوجا احمەت ياساۋي كەسەنەسىنە كەلدى

None
None
 نۇر-سۇلتان. قازاقپارات - بۇگىن بەلگىلى رەجيسسەر مەتين گيۋناي «ازىرەت سۇلتان» مەملەكەتتىك تاريحي-مادەني قورىق-مۋزەيىنە كەلدى.

قوجا احمەت ياساۋي كەسەنەسىنە زيارات جاساپ، بابالار رۋحىنا تاعزىم ەتكەن رەجيسسەر جەراستى قىلۋەتى مەن شىعىس مونشاسى، ءرابيا سۇلتان بەگىم انا كەسەنەسى جانە قۇندى مۇرالارمەن تانىستى، - دەپ حابارلايدى «وتىرار».

«اتا جۇرتقا اڭساپ جەتتىم. ەرەكشە اسەردەمىن. تۇركىستان - ەكىنشى مەككە. تۇركىستان - قاسيەتكە ەڭ باي جەر. تۇركىستان - تاريحتىڭ جەرى. مۇندا كەلگەن ءاربىر ازامات باسىن ءيىپ، قاسيەتىنە العىس ايتىپ كەلۋى كەرەك. تۇركى جۇرتىنىڭ تۇلعاسى قوجا احمەت ياساۋي بابامىزدىڭ قابىرىنىڭ ءوزى ادامزات بالاسىن سابىر مەن يمانعا، مەيىرىم مەن ىزگىلىككە شاقىرىپ تۇرعانداي. جادىگەرلەرىنىڭ ءوزى اتا-بابامىز ءتىل قاتىپ تۇرعانداي ءۇنسىز عانا سويلەيدى. ەلدىڭ ىرىسى مەن بەرەكەسىنىڭ سيمۆولى تايقازاننىڭ تۇرىسى قانداي اسەرلى. قانشاما عاسىردى باسىنان وتكەرگەن كىرپىشتەردىڭ ەرەكشە كورىنىسى جانىڭا ءوز شاراپاتىن سىيلاسا، قۇدىقتىڭ ءزامزام سۋىنىڭ ءوزى عاسىرلار ءدامىن سەزدىرەدى»، - دەدى مەتين گيۋناي.

ايتا كەتەيىك، كينوسۇيەر كورەرمەنگە بەلگىلى قويۋشى - رەجيسسەر، «ەرتۇعىرىل» سەريالىنىڭ اۆتورى ءارى رەجيسسەرى گيۋناي مەتين ەكى كۇن بويى وتىرارتوبە، ساۋران قالاشىقتارىمەن تانىسقان بولاتىن. ەلباسىنىڭ ارنايى شاقىرۋىمەن قازاقستانعا كەلىپ داڭقتى باتىر - قاسىم حان جايلى كوپ سەريالى فيلم ءتۇسىرۋدى قولعا العان رەجيسسەر جوباعا تاريحي ورىنداردى ىزدەستىرىپ جاتىر.

وسىعان دەيىن، ق ر مادەنيەت جانە سپورت ءمينيسترى ارىستانبەك مۇحامەدي ۇلى مەتين گيۋنايمەن بىرگە وتىرار اۋدانىنا بارىپ، وتىرار قالاشىعىن ارالادى. ۇلى جىبەك جولى بويىنداعى مادەنيەت پەن رۋحانياتتىڭ ورتالىعى اتانعان كونە قالا وتىرارعا جاسالعان ساپاردىڭ ماقساتى - قازاق حاندىعى مەن تاريحى، داڭقتى باتىر قاسىم حاننىڭ ەل بولاشاعى ءۇشىن ايانباي سىڭىرگەن ەڭبەگى جايلى تاريحي فيلم ءتۇسىرۋدى كيەلى وتىرار جەرىنەن باستاۋ، تامىرى تەرەڭ تاريحىمىز بەن باتىرلار جولىن تەك قازاقستانعا عانا ەمەس دۇنيەجۇزىنە تانىتۋ.



وسى ورايدا قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازاربايەۆتىڭ ارنايى شاقىرتۋىمەن اۋقىمدى جوبانى قولعا العان تانىمال رەجيسسەر مەتين گيۋناي جىلدىڭ ءتورت مەزگىلىن دە قامتي وتىرىپ ءۇش جىل ىشىندە كوپ سەريالى تاريحي فيلم ءتۇسىرۋدى قولعا العان.

كينو ارقىلى ەلىمىزدىڭ ۇلى تۇلعالارىن الەمگە تانىتۋ ماقساتىندا ق ر مادەنيەت جانە سپورت مينيسترلىگى كەڭىنەن قولداۋ تانىتۋدا.

«ەر تۇعىرىل» كينوسىنىڭ رەجيسسەرى مەتين گيۋناي ەلباسىنىڭ شاقىرۋىمەن قازاقستانعا كەلىپ ۇلكەن جوبانى قولعا الۋدا. قاسىمحان جايلى كينونىڭ سەناريىن كەرەمەت ەتىپ جازىپ شىقتى. بۇل جوبا - كۇردەلى ءارى اۋقىمدى بولعاندىقتان ءبىز جان-جاقتى دايىندىق جۇمىستارىن جۇرگىزىپ جاتىرمىز. ماقساتىمىز ونەردىڭ بارلىق سالاسىنىڭ جۇمىستارىن ءبىر جۇيەگە كەلتىرىپ توعىستىرۋ. وسى ءىرى جوبالاردىڭ ارقاسىندا كونە قالالارىمىز وتىرار، ساۋران، سارايشىقتاردى دۇنيەجۇزىنە پاش ەتۋ. اتالعان ءىرى جوبالارمەن قاتار تاريحي ورىندارعا رەستاۆراتسيالىق جۇمىستار جۇرگىزىلەدى. ارحەولوگيالىق قازبا جۇمىستارى ارقاسىندا دا كوپتەگەن دەرەكتەر تابىلدى. ولاردى دا تانىتىپ، تاريحىمىزدى جانداندىرۋىمىز ءتيىس. تاريحىمىزدى شىعارۋ ارقىلى دۇنيەجۇزى تۋريستەرىن قازاقستانعا شاقىرا الامىز»، - دەدى ارىستانبەك مۇحامەدي ۇلى.

«اتا توپىراعىمىزعا كەلگەنىمە قۋانىشتىمىن. وسى ولكەنى ماعان ارنايى كەلىپ تانىستىرعان مينيستر ارىستانبەك مۇحامەدي ۇلىنا ەرەكشە العىسىمدى ايتامىن. ءبىزدىڭ تاريحىمىز ورتاق. تاريحي تۇلعانىڭ ءومىرى جايلى ءتۇسىرىلىم باستاۋدى قولعا الىپ جاتىرمىز. ءدال قازىر ءبىزدىڭ تۇسىرىلىمگە كەلەتىن ىڭعايلى ورىندارمەن تانىسىپ جاتىرمىز. ۇلكەن ءىس جاساۋدى جوسپارلاعاندىقتان شىنايى، تاريحي جەرلەردى قاراستىرۋدامىز. تاعى دا ءۇش مەكەن جوسپاردا بار»، - دەدى مەتين گيۋناي.

سوڭعى جاڭالىقتار