ەكسپوعا كەلىپ قازاق ەلىن تۇراقتاپ قالعان افريكالىق كەلىنشەكتىڭ قازىرگى جاعدايى قالاي؟

None
None
 نۇر-سۇلتان. قازاقپارات - 2017-جىلى حالىقارالىق ەكسپو كورمەسىنە كەلىپ، كەيىن قازاق جىگىتىنەن اياعى اۋىرلاپ، ەلدە قالىپ قويعان مونيكا كاپتىڭ وقيعاسى كوپشىلىكتى ءدۇر سىلكىنتكەن ەدى.

ەكى جىلدان استام ۋاقىت بويى قازاقستاندى پانالاپ كەلگەن افريكالىق ايەلدىڭ قازىرگى جاعدايى قالاي؟ KAZ. NUR. KZ ءتىلشىسى قارا ءناسىلدى كەلىنشەكتىڭ بۇگىنگى جاعدايىمەن تانىسىپ قايتتى.

مونيكا قازاق ەلىنە 2017-جىلدىڭ باسىندا كەلگەن. ەلوردالىق ءدامحانالاردىڭ بىرىندە ءان ايتىپ، ءبي بيلەپ ءناپاقا تاپقان ول، قازاق جىگىتىنەن جۇكتى بولىپ، قازاقستاندا قالىپ قويادى.



«قازاقستانعا كەلگەنىمە ەكى جىل بولدى. اتا-انام، جاقىندارىم كونگودا بولسا دا، ول جاققا قايتقىم كەلمەيدى. ولار مەنىڭ وسىندا ەكەنىمدى بىلەدى. قازىر قىزىم بلەسسينگ ەكەۋمىز انالار ءۇيىن پانالاپ وتىرعانىمىزعا ءتورت ايدان استام ۋاقىت ءوتتى. قىزىم بلەسسينگكە ءوزىم اكە، ءوزىم شەشە بولىپ وتىرعان جايىم بار»، - دەپ كۇرسىندى مونيكا.

افريكالىق كەلىنشەك بۇگىندە بوسقىن مارتەبەسىن الۋ ءۇشىن سوتقا اپەللياتسيا بەرىپ قويعان.

«ەگەر بارلىعى جاقسى بولىپ، سوت مەنىڭ پايداما شەشىلسە، وسى ەلدە كەم دەگەندە ءۇش جىلداي ۋاقىت بولامىن. جالپى قازاق ەلىنە باسىمدى ءيىپ راحمەت ايتامىن. مەنى قابىلداپ، قىزىم ەكەۋمىزدى باۋىرىنا باستى.



نۇر-سۇلتانعا دا ۇيرەنىسىپ قالدىق. باستاپقىدا سۋىعى مەن ايازىنا ەتىمىز ۇيرەنبەسە دە، كەيىن وعان دە ۇيرەندىك. سوسىن ماعان الماتى قالاسى دا ۇنايدى، وتە ادەمى قالا»، - دەپ اعىنان جارىلدى مونيكا.

انالار ءۇيىن پانالاعان كەلىنشەك قازىرگى جاعدايىنىڭ جاقسى ەكەنىن ايتتى. سەگىز ايلىق قىزى بلەسسينگ تە بۇل جەرگە ابدەن ۇيرەنگەن.

«بلەسسينگتى ءبىز ەركەلەتىپ ماشا دەيمىز. مونيكا دا وسى جەرگە ۇيرەندى. قىزدارمەن تاتۋ تۇرادى، ءبارى ءبىر قالىپتى»، - دەيدى ەلورداداعى انالار ءۇيىنىڭ ۇيلەستىرۋشىسى.

سوڭعى جاڭالىقتار