جازۋشىلار وداعىندا ءبىر توپ قالامگەر ماراپاتتالدى

 نۇر-سۇلتان. قازاقپارات - قازاقستان جازۋشىلار وداعىندا اتىراۋ وبلىسى اكىمدىگى مەن جازۋشىلار وداعىنىڭ بىرلەسىپ تاعايىنداعان جۇمەكەن ناجىمەدەنوۆ اتىنداعى پوەزيا جانە عابدول سلانوۆ اتىنداعى پروزا سىيلىعى ءبىر توپ قالامگەرگە تابىستالدى.

شاراعا قازاقستان جازۋشىلار وداعى باسقارماسىنىڭ ءتوراعاسى  ۇلىقبەك ەسداۋلەت، اتىراۋ وبلىسىنان ارنايى كەلگەن دەلەگاتسيا جانە ايكەن جۇمەكەن قىزى باستاعان ج. ناجىمەدەنوۆتىڭ ۇرپاقتارى قاتىستى.

ءتوراعا  ۇلىقبەك ورازباي ۇلىنىڭ العى سوزىنەن كەيىن ءبىر توپ قالامگەرگە سىيلىق تابىس ەتىلسە، ەلىمىزدىڭ باتىس وڭىرىنەن ارنايى كەلگەن اتىراۋ وبلىسىنىڭ «عىلىمي- ادىستەمەلىك حالىق شىعارماشىلىعى مەن مادەني دەمالىس قىزمەتتەرىن ۇيىمداستىرۋ» ورتالىعىنىڭ باسشىسى باقىتبەك مىرزاعالي ۇلى سارتبايەۆ اقجارما تىلەگىن ارناپ، وبلىس اكىمىنىڭ قۇتتىقتاۋ لەبىزىن جەتكىزدى. ءىس-شارا سوڭىندا ايكەن جۇمەكەن قىزى قالامگەرلەردى قۇتتىقتاپ، ۇيىمداستىرۋشىلارعا العىسىن ءبىلدىردى.

ج. ناجىمەدەنوۆ جانە ع. سلانوۆ اتىنداعى ادەبي سىيلىعىنىڭ يەگەرلەرى 2019 -جىلدىڭ 4 -ماۋسىم كۇنى وتكەن سەكرەتاريات ماجىلىسىندە بەلگىلى بولعان.

اتاپ ايتساق، پوەزيا نوميناتسياسى بويىنشا جۇمەكەن اتىنداعى سىيلىققا اقىندار مەيىرحان اقداۋلەت ۇلى، باۋىرجان جاقىپ، سۇراعان راحمەت ۇلى، مۇرات شايماران جانە نۇرتاس تۇرعانبەك ۇلى يە بولدى.

پروزا نوميناتسياسى بويىنشا ع. سلانوۆ اتىنداعى سىيلىقتىڭ لاۋرەاتتارى -  جازۋشىلار تىنىمباي نۇرماعانبەتوۆ، نەسىپبەك ءداۋتاي ۇلى، مولداحمەت قاناز، نۇرلان قامي، اسقار التاي.

Massaget.kz