ەڭ قولجەتىمدى سپورت جايلى نە بىلەمىز؟

None
None
 نۇر-سۇلتان. قازاقپارات - Vesti.kz پورتالىنىڭ «جيۆي سپورتوم» جوباسىنىڭ ءۇشىنشى شىعارىلىمى جاپپاي جۇگىرۋ سپورتىنا ارنالدى.

جەڭىل اتلەتيكانىڭ بۇل ءتۇرى الەمدەگى ەڭ تانىمال ءارى دەنساۋلىققا پايدالىسى سانالادى. قازىر قازاقستاندا كۇشىن سىناپ كورگىسى كەلەتىن اۋەسقويلار ءۇشىن كوپ جارىستار وتكىزىلىپ جاتىر. سايتقا ساراپشى رەتىندە «الماتى مارافون» ديرەكتورى سالتانات قازىبايەۆا تاڭدالدى.

ول وسى سپورت تۇرىنىڭ قىر-سىرىمەن ءبولىسىپ قانا قويماي، جارىستاردى ۇيىمداستىرۋ تۋرالى دا ءبىراز تاجىريبەسىمەن بولىسەدى.

جاپپاي جۇگىرۋ جايلى

جالپى اقپارات - ءبىرىنشى كەزەكتە اۋەسقوي جۇگىرۋ كەز كەلگەن ادامعا قولجەتىمدى.

جاتتىعۋدى فيزيكالىق فورماعا قاراماستان باستاۋعا بولادى. جۇگىرۋ جۇرەك- قان تامىرلارى جانە دەمالۋ جۇيەسىن جاتتىقتىرادى. وعان قوسا جۇگىرۋ ارقىلى سالماق تاستاۋعا بولادى. جاتتىعۋ جوسپارىن دۇرىس تاڭداعان جاعدايدا ارتىق سالماقتان ارىلۋعا تاپتىرماس مۇمكىندىك. سونىمەن قاتار، شىدامدىلىققا، وزىنە دەگەن سەنىمدىلىككە، پسيحولوگيالىق توزىمدىلىككە ۇيرەتىپ، يممۋنيتەتتىڭ جاقسارۋىنا اسەر ەتەدى. جۇگىرۋ كەزىندە اعزانىڭ نەگىزگى فۋنكيالارى ويانادى. زاماناۋي قوعامدا جۇگىرۋ مەديتاتسيانىڭ ءبىر تۇرىنە اينالعان. بۇل وزىڭمەن جەكە قالۋعا، ويىڭدى جيناقتاۋعا تاماشا مۇمكىندىك.

مىسالى مەن جۇگىرگەن كەزدە شەشىلمەي جۇرگەن ماسەلەلەرىمنىڭ جولىن ىزدەۋگە تىرىسامىن، ويتكەنى جۇگىرۋ ءىس- ارەكەتتىڭ تيىمدىلىگىن ارتتىرادى. جۇگىرۋ سپورتتىڭ پاتشايىمى سانالاتىن جەڭىل اتلەتيكاعا جاتادى. ءدال قازىر بۇل سپورت ءتۇرى ەلىمىزدە قارىشتاپ دامىپ كەلەدى. كەز كەلگەن ادامعا جۇگىرۋ ءۇشىن قولايلى جاعداي جاسالعان. جۇگىرىپ باستاۋ ءۇشىن تەك دۇرىس سپورت اياقكيىمى مەن نيەت قاجەت، - دەيدى قازىبايەۆا.

جۇگىرۋدىڭ قازاقستانداعى دامۋ قارقىنى

جۇگىرۋ الەم بويىنشا دا، قازاقستاندا دا تانىمال سپورت تۇرىنە جاتادى. وعان قوسا جىل وتكەن سايىن جۇگىرۋدىڭ ەل اراسىنادعى تانىمالدىعى ارتىپ كەلەدى. الماتى جانە بۇكىل قازاقستان بويىنشا ناقتى ستاتيستيكا بار.

ەگەر «الماتى مارافونى» العاش ۇيىمداستىرىلعان كەزدە ەكى جارىم مىڭ جەلاياق قاتىسۋعا نيەت بىلدىرسە، بيىل ولاردىڭ سانى 17 مىڭعا جەتكەن. جاپپاي جۇگىرۋگە تەك قازاقستاندىقتار عانا ەمەس، الەمنىڭ 53 ەلىنەن كەلگەن جەلاياقتار قاتىسقان. بيىل 21 ادام «الماتى مارافونىنىڭ» امباسسادورى بولدى. ولاردىڭ ءارقايسى 20 ادامنان تۇراتىن كوماندا جيناپ، جاپپاي جۇگىرۋدە باق سىنادى. جۇگىرۋگە نيەت بىلدىرگەندەردىڭ جاس شاماسى ءارتۇرلى. 83 جاستاعى قاريا دا سالاۋاتتى ءومىر سالتىن ساقتاپ، جۇگىرۋگە قاتىستى. ال جالپى ورتاشا جاس -  31-32.

جاس بويىنشا شەكتەۋ جوق. ەڭ باستىسى دەنساۋلىقتىڭ مىعىم بولۋى. ءبىز كىشكەنتاي بالادان باستاپ قارياعا دەيىن جۇگىرۋگە باۋلۋعا تىرىسامىز. ستاتيستيكا بويىنشا ولاردىڭ سانى ارتىپ كەلەدى. جاپپاي جۇگىرۋگە العاشقى قاتىسۋشىلار ەڭ قىسقا قاشىقتىقتى تاڭدايدى.

ال كەلەر جىلى ءسال كوبەيتە تۇسەدى. دەمەك ول شىڭدالىپ، دايىندالىپ، دەڭگەيى كوتەرىلگەن. ەڭ تانىمال قاشىقتىق -  10 شاقىرىم. بيىل 10 مىڭعا جۋىق ادام وسى قاشىقتىقتى جۇگىرىپ وتكەن.

ەرەكشەلىگى نەدە؟

جوعارىدا ايتىپ وتكەنىمدەي، جۇگىرۋ -  ەڭ قولجەتىمدى جانە ارزان سپورت ءتۇرى. تەك كيىم الۋعا شىعىندالاسىز. ساياباقتا، ستاديوندا، كوشەدە، كەز كەلگەن جەردە جانە كەز كەلگەن ۋاقىتتا جۇگىرۋگە بولادى. بۇل جاعىنان ەشقانداي قاتىپ قالعان ەرەجە جوق. اركىم ءوز ۋاقىتىنا قاراي ىڭعايلاپ الادى. دەنساۋلىقتى جاقسارتۋ ءۇشىن جۇگىرۋ ورگانيزمنىڭ جانە دەنە مۇشەلەرىنىڭ قالىپقا كەلۋىنە سەپ بولادى. باستى ەرەكشەلىگى -  كىشكەنتاي قان تامىرلارىنىڭ ۇلعايۋى جانە بارلىق جاسۋشالاردىڭ وتتەگىمەن تولۋى. ونىڭ ۇستىنە جۇگىرۋ زات الماسۋىن جىلدامداتا تۇسەدى. مۇنىڭ ءبارى اعزانىڭ ساۋىعۋىنا اسەر ەتەدى.

جاراقات الۋ قاۋپى

ستاتيستيكا بويىنشا اۋەسقوي جەلاياقتاردىڭ 70 پروتسەنتى جاراقات الادى ەكەن. بۇل ءبىرىنشى كەزەكتە جاتتىعۋ كەزىندە جىبەرەتىن قاتەلەرگە بايلانىستى. سول سەبەپتى جاتتىقتىرۋشىنىڭ قول استىندا دايىندىق جۇمىستارىن جاساۋعا كەڭەس بەرەمىز. تىم بولماعاندا جاتتىقتىرۋشىدان جۇگىرۋدىڭ بازالىق تەحنيكاسىن ۇيرەنۋ قاجەت. بارىنشا پايدالى ءارى قاۋىپسىز بولۋ ءۇشىن اپتاسىنا 3-4 رەت 30-40 شاقىرىم جۇگىرىپ وتىرۋ قاجەت.

كىمدەرگە جۇگىرۋگە بولمايدى؟

جۇگىرۋدى ەندى باستاعان ادامدارعا مەديتسينالىق تەكسەرۋدەن ءوتىپ، جاتتىعۋدى باستاماس بۇرىن دارىگەرمەن كەڭەسۋدى ۇسىنامىز. ويتكەنى جۇگىرۋگە بولمايتىن ادامدار دا كەزدەسەدى. ءار ادامنىڭ اعزاسى ءارتۇرلى. الىستان ناشار كورەتىندەر، سوزىلمالى اۋرۋلاردىڭ اسقىنۋى، جۇرەك- قان تامىرلارى اۋرۋى بارلار جانە دەنە بۋىنى اۋىراتىندارعا جۇگىرۋگە بولمايدى.

قاشان جانە قاي جەردە جۇگىرۋ قاجەت؟

جىلدىڭ كەز كەلگەن مەرزىمىندە جۇگىرۋگە بولادى. كەي ادام كۇن سۋىقتا جۇگىرۋدىڭ پايداسىنان زيانى كوپ دەيدى. الايدا بۇل قاتە پىكىر. ەڭ ماڭىزدىسى دۇرىس كيىنۋ. ونىڭ ۇستىنە ادام كۇن سۋىقتا جاز مەزگىلىندە جۇگىرگەنگە قاراعاندا از كۇش- قۋات جۇمسايدى. ويتكەنى اعزا دەنەنى سالقىنداتۋ ءۇشىن كۇش- قۋات جۇمساپ، كوپ سۋ جوعالتادى. سۋىق كۇندە جۇگىرۋدى قالاماساڭىز، ەلىمىزدە جابىق جۇگىرۋ الاڭدارى جەتەرلىك. اراسىندا تەگىنى دە، اقىلىسى دا كەزەدسەدى.

نە كيەمىز؟

وزگە سپورت تۇرلەرىنە قاراعاندا جۇگىرۋ ءۇشىن از شىعىندالاسىز. باستىسى ىڭعايلى سپورت اياقكيىمىنىڭ بولعانى جەتكىلىكتى. كەز كەلگەن برەندتە جەلاياقتارعا ارنالعان اياقكيىمدەرى بار. ەگەر جۇگىرۋدى ەڭ باستاساڭىز ورتا دەڭگەيلى تابانى مىقتى اياقكيىمدى تاڭداڭىز. فورماعا كەلەر بولساق، بۇل جىل مەزگىلىنە بايلانىستى. جازدى كۇندەرى شولاق نە سپورت شالبارى، جەڭىل جەيدە نەمەسە جۇگىرۋگە ارنالعان مايكا كيگەن ىڭعايلى. سۋىق مەزگىلدە كاجەك، تەرموشالبار، باسكيىم، جىلى شۇلىق، شارف كيۋ مىندەتتى.

قاي جاستان باستاپ جاتتىعۋدى باستاۋعا بولادى؟

بۇل تۇرعىدا قاتىپ قالعان ەرەجە جوق. جۇگىرۋدى دامىتۋ ءۇشىن بالالار اراسىندا ءتۇرلى جارىستار وتكىزىپ تۇرامىز. ارينە ولار 100-200 مەتر سەكىلدى قىسقا قاشىقتىققا جۇگىرەدى. دەگەنمەن وسى باستان بالالاردى جۇگىرۋگە باۋلۋ قاجەت، سپورتقا دەگەن ماحابباتتى وياتۋ كەرەك. مامانداردىڭ ايتۋى بويىنشا 10 جاستان باستاپ جۇگىرۋمەن ايلانىسقان دۇرىس.

قازاقستانداعى اۋەسقويلارعا ارنالعان جارىستار

- قازىرگى تاڭدا اۋەسقويلار اراسىندا جۇگىرۋدەن ءتۇرلى جارىستار ۇيىمداستىرىلىپ جاتىر. مىسالى ءبىز «الماتى مارافونىنان» بولەك ءبىر جىل ىشىندە تاعى 20 جارىس وتكىزەمىز. تەك الماتىدا عانا ەمەس، قازاقستاننىڭ بارلىق قالالارىندا جارىستار ءوتىپ تۇرادى، - دەپ قورىتىندىلادى سالتانات قازىبايەۆا. ايتا كەتەيىك، Vesti.kz سايتى «جيۆي سپورتوم» جوباسىن جۋىردا عانا باستاعان بولاتىن. نەگىزگى ماقسات -  ەلىمىزدە بۇقارالىق سپورتتى دامىتۋ ءارى ناسيحاتتاۋ. ءار شىعارىلىمدا كوپشىلىك اينالىسۋعا ىڭعايلى سپورت ءتۇرى جايلى جازاتىن بولادى. ساراپشىلار رەتىندە تانىمال چەمپيوندار، جەتىستىك شىڭىن باعىندىرعان اۋەسقوي سپورتشىلار دا تاڭدالادى.

 

Massaget.kz

سوڭعى جاڭالىقتار