جيىرما جىلدىق كەزدەسۋىندە سىنىپتاستار كوپبالالى اناعا ءۇي سىيلادى

نۇر-سۇلتان. قازاقپارات - تۇركىستان وبلىسى بايدىبەك اۋدانى شاقپاق اۋىلىنداعى كوپبالالى اقبالا ءومىرزاقوۆانىڭ جانۇياسى باسپانالى بولدى، دەپ حابارلايدى قازاقپارات.

پاتەردەن پاتەرگە كوشىپ، جالدامالى ۇيدە 4 بالانى اسىراپ، ءومىر ءسۇرىپ كەلە جاتقان وتباسىعا سىنىپتاستارى - 1999 -جىلى مەكتەپتى بىتىرگەن تۇلەكتەر شاقپاق اۋىلىنان 3 بولمەلى پاتەر كىلتىن تارتۋ ەتىپ، 20 جىلدىق كەزدەسۋلەرىندە ساۋاپتى ءىس جاسادى.

سونىمەن قاتار، وزدەرىنىڭ سىنىپتاستارى اقبالا ءومىرزاقوۆانىڭ ۇيىنە كورىمدىك رەتىندە تۇرعىن ۇيگە قاجەتتى تۇرمىستىق جيھازدار الىپ بەرىپ، ازىق-تۇلىكپەن قامتاماسىز ەتىپ، كومەك كورسەتتى.

باسپاناعا يە بولعان كوپبالالى وتباسى اقبالا ءومىرزاقوۆا سىنىپتاستارىنا العىسىن ءبىلدىرىپ، ريزاشىلىعىن جەتكىزدى. ايتا كەتەرلىك جايت، اقبالا ءومىرزاقوۆانىڭ جولداسى ەرتە قايتىس بولعان. ءتورت بالاسى بار. ۇلكەنى 8-سىنىپتا، كىشىسى دايىندىقتا وقيدى.