جەڭىلىپ كورمەگەن قازاقستاندىق كاسىپقوي بوكسشىنىڭ جەكپە-جەك داتاسى اتالدى⠀

نۇر-سۇلتان. قازاقپارات - پروفي-رينگتە جەڭىلىپ كورمەگەن قازاقستاندىق بوكسشى، WBC Asia, WBO Global جانە WBA International بەلدىكتەرىنىڭ يەگەرى ايدوس ەربوسىن ۇلى (11-0، 8 ك و) كەلەسى جەكپە-جەگىن تامىز ايىندا وتكىزەدى.

بۇل تۋرالى ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسشى» پاراقشاسىندا ءمالىم ەتىلدى، دەپ حابارلايدى قازاقپارات.

«بوكسشىنىڭ وكىلدەرىنىڭ اقپاراتىنا سايكەس، ايدوستىڭ كەلەسى ايقاسى 14 -تامىزعا جوسپارلانىپ وتىر. وتەتىن ورنى ازىرگە بەلگىسىز. ءبىراق بۇل كانادا، اۋستريا نەمەسە رەسەي استاناسى ماسكەۋ بولۋى مۇمكىن»، - دەلىنگەن حابارلامادا.

ەسكە سالايىق، ا. ەربوسىن ۇلى بيىلعى 24 -ناۋرىزدا الماتىدا وتكەن سوڭعى جەكپە-جەگى بارىسىندا تورەشىلەردىڭ ءبىراۋىزدى شەشىمىمەن ناميبيالىق سپورتشى لۋكاس ندافولۋمۋدى (15-1, 6 ك و) جەڭىپ، WBA International تيتۋلىن يەلەندى.