موڭعوليا قازاقستان قوناقتارىن قابىلدايدى - شەتەلدەگى قازاق ءتىلدى ب ا ق- قا شولۋ
قازاق مالشىلارى تۇيە باعىپ مول تابىس تابۋدا - «اعاجاي- التاي» پورتالى
«شىڭجاڭنىڭ التاي ايماعىنداعى بۋرىلتوعاي اۋدانى بايىرعى جىبەك جولىنىڭ بويىندا ورنالاسقان اۋدان. بۇل اراداعى قازاق مالشىلار ەجەلدەن بەرى تۇيە باعۋدى كاسىپ ەتكەن. جۋىرداعى جىلداردان بەرى بۋرىلتوعاي اۋدانى بۇل كاسىپتى بەلسەندى دامىتىپ، «بىرلەسكەن كوپەراتيۆ، باعىمشىلىق بازاسى، تۇيەشى وتباسىلار» سىندى تۇيە باعۋدىڭ بيزنەس فورماسىن قالىپتاستىرىپ، اتالعان كاسىپ ارقىلى حالىقتىڭ تابىسىن كوبەيتۋدى جەدەل ىلگەرىلەتكەن. ءقازىر بۇل اۋداندا 600-دەن استام وتباسى تۇيە باعۋدى كاسىپ ەتىپ كەلەدى. بۋرىلتوعايدا قولدا باعىلاتىن تۇيەلەردىڭ سانى 20 مىڭنان اسادى. مالشىلاردىڭ جىلدىق كىرىسى ورتا ەسەپپەن ادام باسىنا 30 مىڭ يۋاننان جوعارى (1605000 تەڭگە كولەمىندە - اۆت.)»، - دەپ جازادى «اعاجاي- التاي» پورتالى.
«سۋرەتتە التاي ايماعى، بۋرىلتوعاي اۋدانىنداعى مالشى تۇيەلەرىن ۇلىڭگىر كولىنەن سۋارۋدا» دەلىنگەن.
ايتا كەتۋ كەرەك، ۇلىڭگىر كولى - شىڭجاڭداعى ەڭ ۇلكەن كول. ۇلىڭگىر كولى ۇلىڭگىر وزەنىمەن شىڭگىل وزەنىنىڭ تومەنگى ساعاسىندا ورنالاسقان. جالپى كولەمى 827 شارشى شاقىرىم، تەڭىز دەڭگەيىنەن 468 مەتر بيىكتىكتە.
موڭعوليا قازاقستان قوناقتارىن قابىلدايدى - KAZNEWS
موڭعوليا، قازاقستان رەسپۋبليكاسى اراسىندا تىكەلەي رەيس اشىلىپ، «سكات» اۋە كومپانياسىنىڭ Boeing-737 ۇشاعى العاش رەت 3 -ماۋسىم كۇنى ساعات 04.50-دە ۇلانباتىر قالاسىنا كەلىپ قوندى، دەپ حابارلايدى موڭعوليالىق KAZNEWS اقاپارتتىق پورتالى.
«ەڭ اۋەلى نۇر-سۇلتان- ۇلانباتىر باعىتىنا حالىقارالىق تىكەلەي رەيستىڭ اشىلۋىنا قولداۋ كورسەتكەن موڭعوليا ۇكىمەتىنە، جول-ترانسپورت مينيسترلىگىنە، ازاماتتىق اۆياتسيا باس باسقارماسىنا، سونداي- اق وزگە دە قۇزىرلى ورگاندارعا العىس بىلدىرەمىن. اتالمىش رەيس حالىقارالىق تۇراقتى باعىت بولعاندىقتان، ەكى ەل اراسىنداعى جان- جاقتى ىنتىماقتاستىق جوعارى دەڭگەيگە كوتەرىلەدى. ساياسات، ەكونوميكا، مادەنيەت، گۋمانيتارلىق جانە تۋريزم سالاسىنىڭ دامۋىنا ۇلەس قوسادى» - دەپ اتاپ ءوتتى قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى قالىبەك قوبىلاندين بۇقارالىق اقپاراتتىق قۇرالدارعا ارنالعان بريفينگتە» دەپ جازدى اقپارات اگەنتتىگى.
اتالعان اقپارات كوزىنىڭ مالىمەتىنشە، «سكات» اۋە كومپانياسى نۇر-سۇلتان - ۇلانباتىر باعىتىنا ءار سارسەنبى مەن جەكسەنبى كۇندەرى Boeing-737 ۇشاعى ارقىلى ءبىر جاعىنا 144 جولاۋشى تاسىمالدايدى. ۇلانباتىردان دۇيسەنبى مەن بەيسەنبى كۇندەرى ساعات 06:00 ۇشىپ، نۇر-سۇلتان قالاسىنا 08:30-دا قونادى. بيلەت باعاسى $240-$250 ا ق ش دوللارى، بارىپ قايتۋعا $460-دان.
«موڭعوليالىق جولاۋشىلار ءۇشىن الماتى، شىمكەنت، تاراز، وسكەمەن، اقتاۋ جانە پاۆلوداردان ىڭعايلى تۇيىستەر كۇتىپ تۇر. ال، بۇگىننەن باستاپ موڭعوليا - قازاقستان قوناقتارىن قابىلدايدى»، دەپ تۇيىندەيدى kaznews.mn.
مىسىر پەرعاۋىن ءمۇسىنىنىڭ اۋكسيوندا ساتىلۋىن قالامادى - TRT
مىسىر اكىمشىلىگى ۇلى بريتانيانى ءبىزدىڭ زامانىمزدان بۇرىنعى 1334-1325 -جىلدارى اراسىندا بيلىك جۇرگىزگەن تۋتانحامون باسىنىڭ التىن ءمۇسىنى ءۇشىن شىلدە ايىندا ۇيىمداستىرىلاتىن اۋكسيوندى توقتاتۋعا شاقىرۋ تاستادى.
بۇل تۋرالى وسى اپتادا تۇركيانىڭ تەليەۆيزيا جانە راديو مەكەمەسىنىڭ سايتى حابارلادى.
مىسىر سىرتقى ىستەر مينيسترلىگى 4 -شىلدەدە لوندون قالاسىندا وتكىزىلەتىن اۋكسيونعا بايلانىستى اقپارات شىققان سوڭ مالىمدەمە جاساعان.
مىسىردىڭ لوندونداعى وكىلەتتى ەلشىلىگىنىڭ اۋكسيوندى توقتاتۋ جانە ءمۇسىننىڭ مىسىرعا قايتارىلۋى تۋراسىندا ۇلى بريتانيا سىرتقى ىستەر مينيسترلىگىمەن حابارلاسقانى بىلدىرىلگەن مالىمدەمەدە لوندون اكىمشىلىگىنىڭ جاۋابى جونىندە مالىمەت بەرىلمەدى.
«اتالمىش ماسەلەگە بايلانىستى اۋكسيون زالى جانە بىرىككەن ۇلتتار ۇيىمى ءبىلىم، عىلىم جانە مادەنيەت ۇيىمى UNESCO- مەن بايلانىس جاسالعانى بىلدىرىلگەن مالىمدەمەدە قازىرگى زاڭدار اياسىندا بۇل تاريحي مۇرانىڭ مىسىرعا تيەسىلى ەكەندىگى كورسەتىلگەن»، دەپ جازدى تۇركيالىق ب ا ق.
يران راۋشان سۋىن ءوندىرۋ بويىنشا الەمدە ءبىرىنشى ورىندا - «فارس» اقپارات اگەنتتىگى
يراننىڭ اۋىلشارۋاشىلىق مينيسترلىگى «يير الەمدە راۋشان سۋىن، اسىرەسە مۇحاممادي گۇلىنىڭ سۋىن ءوندىرۋ بويىنشا ءبىرىنشى ورىندا، ال وسى گۇلدىڭ مايىن ءوندىرۋ بويىنشا ءتورتىنشى ورىندا تۇر»، دەپ ءمالىم ەتتى.
بۇل تۋرالى وسى اپتادا Fars اقپارات اگەنتتىگى حابارلادى.
اتالعان اقپارات اگەنتتىگىنىڭ حابارلاۋى بويىنشا، يراننىڭ اۋىلشارۋاشىلىق مينيسترلىگى ءبىر مالىمدەمەسىندە ەلدە راۋشان سۋىن ەڭ كوپ وندىرەتىن قالانىڭ كاشان ەكەنىن، وندا ورتاشا ەسەپپەن گەكتارىنا 4 توننا راۋشان سۋى وندىرىلەتىنىن ايتىپ، «قازىر كاشاندا مۇحاممادي گۇلى وسەتىن 3500 گەكتار القاپ بار»، ‑ دەپ مالىمدەگەن.
«وسى مالىمەت بويىنشا، 2018 -جىلى يراننان قۇنى شامامەن 10 ميلليون دوللاردى قۇرايتىن مۇحاممادي گۇلىنىڭ سۋى مەن مايى ەكسپورتتالعان» دەپ تۇيىندەيدى parstoday.com.
قازاق مالشىلارى مىڭعىرعان قويىمەن جايلاۋعا كوشتى - «جەنمين جيباو» (People Daily)
«ءار جىلى ماۋسىم ايىن باسىنان ورتا شەنىنە دەيىن بۋرىلتوعاي اۋدانىنىڭ مالشىلارى جايلاۋعا قاراي كوشە باستايدى. 1 مىڭنان استام قازاق مالشىلار وتباسى كيىز ءۇي جانە باسقا دا كەرەك- جاراقتارىن تۇيەگە ارتىپ، مىڭعىرعان قويلارىن شۇبىرتا ايداپ، جازعى جايلاۋعا بەت الادى. بايىرعى زامانداعىداي قاز-قاتار تىزىلگەن تۇيە كەرۋەنى، قاپتاعان قالىڭ قوي، كورگەن جاندى وزگەشە اسەرگە بولەيدى»، دەپ جازدى قىتايدىڭ «جەنمين جيباو» اقپاراتتىق پورتالى.
وزبەكستانعا بەس اي ىشىندە 1,3 ميلليون تۋريست كەلگەن - «ءوزا» اقپاراتتىق اگەنتتىگى
وتكەن جىلمەن سالىستىرعاندا بيىل تۋريستەر سانى 42 پايىزعا ارتقان، دەپ حابارلايدى وزبەكستاننىڭ «ءوزا» مەملەكەتتىك اقپاراتتىق اگەنتتىگى.
بۇنداي اقپاراتتى وزبەكستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى يلحامجان نەماتوۆ ينۆەستيتسيا جانە تۋريزم جايىنداعى مالىمەتتەرىندە ايتقان.
«جىل باسىنان ەسەپتەگەندە سوڭعى بەس ايدا ياعني جىلدىڭ العاشقى شيرەگىندە وزبەكستانعا كەلۋشى تۋريستەر سانى وتكەن جىلعى كورسەتكىشپەن سالىستىرعاندا 42 پايىزعا ارتىپ ولاردىڭ سانى 1,3 ميلليونعا جەتتى. سوڭعى بەس اي ىشىندە وزبەكستان ەكونوميكاسىنا شەتەل ينۆەستيتسياسىن تارتۋعا باعىتتالدى. نەگىزىندە 500,2 ميلليارد سۋمدىق 244 جوبا جاسالىپ سونىڭ ىشىندە 2019 -جىلدا جالپى قۇنى 1,2 ميلليارد سۋم بولاتىن 163 جوبانى جۇزەگە اسىرۋ جوسپارلانىپ وتىر. وسى ارالىقتا، وزبەكستاندا جاسالعان ونىمدەردى ەكسپورت جاساۋ ماسەلەسى بويىنشا وزبەكستان ەلشىلىگى بار بولعان ەلدەرگە ەكسپورت كولەمى 30,6 پايىزعا ارتتى جانە جالپى قۇنى 3,5 ميلليارد سۋمدى قۇرادى» - دەدى سىرتقى ىستەر ءمينيسترىنىڭ ءبىرىنشى ورىنباسارى يلحامجان نەماتوۆ.
اۆتورى: بەيسەن سۇلتان ۇلى