قازاقستاندىق تەننيسشى حەرتوگەنبوس تۋرنيرىنىڭ جارتىلاي فينالىنا شىقتى

نۇر-سۇلتان. قازاقپارات - قازاقستاندىق ەلەنا رىباكينا حەرتوگەنبوس (نيدەرلاندى) تۋرنيرىنىڭ شيرەك فينالىندا بەلگيالىق كيرستەن فليپكەنسپەن كەزدەستى، دەپ حابارلايدى قازاقپارات ءتىلشىسى.

ەكى كۇننەن كەيىن 20 عا تولاتىن قازاقستاندىق تەننيسشى دۇنيەجۇزىلىك رەيتينگتە 134-ورىندا بولسا، 33 جاستاعى تاجىريبەلى قارسىلاسى 69-ساتىدا ەدى.

نەگىزگى تۋرنيرگە ىرىكتەۋ سايىستارىنان كەيىن قوسىلعان ە. رىباكينا بۇل ماتچتى دا ءساتتى باستادى. ءبىرىنشى پارتيادا ەسەپ 1:1 بولعان مەزەتتە برەيك جاساپ، العا شىقتى - 2:1. اقىرى وسى باسىمدىلىعىنان ايىرىلعان جوق - 6:4.

ەكىنشى پارتيادا ە. رىباكينا دوپ بەرگەن ءتورتىنشى گەيم اسا تارتىستى ءوربىپ، 12 مينۋتتان استام ۋاقىتقا سوزىلدى. قازاقستاندىق تەننيسشى قارسىلاسىنىڭ ءتورت بىردەي برەيك- پوينتىن پايدالانۋىنا مۇمكىندىك بەرمەدى. ەسەپ تەڭەستى - 2:2. ەسەسىنە كەلەسى گەيمدە ەلەنا برەيك جاساپ، العا كەتتى - 3:2. سودان كەيىن وسى قارقىنىن جوعالتقان جوق - 6:4.

باسەكە 1 ساعات 19 مينۋتقا سوزىلدى.

ە. رىباكينانىڭ جارتىلاي فينالداعى قارسىلاسى اسا مىقتى. قازاقستاندىق سپورتشى فينالعا شىعۋ ءۇشىن وسى ءتۋرنيردىڭ ءبىرىنشى، الەمنىڭ 4-راكەتكاسى ءارى كورت يەسى كيكي بەرتەنسپەن تالاسادى. ك. بەرتەنس شيرەك فينالدا 22 جاسار رەسەيلىك ناتاليا ۆيحليانسەۆانى 6:3, 6:3 ەسەبىمەن تىزە بۇكتىردى.

جۇلدە قورى 250 مىڭ ەۋرو بولاتىن حەرتوگەنبوس جارىسى 16 -ماۋسىمدا مارەگە جەتىپ، جەڭىمپاز انىقتالادى.

ەسكە سالا كەتەيىك، بۇدان بۇرىن ەلەنا رىباكينانىڭ حەرتوگەنبوستا، زارينا دياستىڭ مانچەستەردە شيرەك فينالعا شىققانىن جازعان بولاتىنبىز.

ال ەرلەر اراسىندا الەكساندر نەدوۆەسوۆ شىمكەنت تۋرنيرىنىڭ جارتىلاي فينالىنا وتە المادى.