قازاقستاندا ينتەرنەت الاياقتاردىڭ بەلسەندىلىگى جيىلەپ كەتتى

نۇر-سۇلتان. قازاقپارات - ق ر ۇ ق ك «مەملەكەتتىك تەحنيكالىق قىزمەت» ر م ك-نىڭ كومپيۋتەرلىك وقيعالار بويىنشا ارەكەت ەتۋ قىزمەتى قازاقستان رەسپۋبليكاسى اۋماعىندا ينتەرنەت الاياقتاردىڭ بەلسەندىلىگى ارتقانىن ايتىپ ەسكەرتەدى، دەپ حابارلايدى قازاقپارات مەكەمەنىڭ سايتىنا سىلتەمە جاساپ.

KZ- CERT قىزمەتىنە قازنەت سەگمەنتىندەگى دومەن يەلەرىنەن كەلىپ تۇسكەن شاعىم كوبەيىپ كەتكەن. ويتكەنى ولارعا ق ر حوستينگ كومپانيالارى اتىنان تومەندەگىدەي فيشينگ ەسكەرتۋ حاتتار كەلە باستاعان.

«قۇرمەتتى دومەن اكىمشىسى! سىزگە isoft.kz اتىنان دومەندى تىركەۋ مەرزىمى اياقتالعانىن حابارلايمىز. سىزگە وسى ەسكەرتۋدى العان ساتتەن باستاپ ءۇش كۇنتىزبەلىك كۇن ىشىندە دومەندى پايدالانۋ ۋاقىتىن سوزدىرۋ ءۇشىن تولەم جاساۋىڭىز كەرەك.

تولەۋ

ەگەر كورسەتىلگەن مەرزىمدە تولەم جاسالماسا دومەندى يەمدەنۋ قۇقىعى توقتاتىلادى. ول دومەندەر اتىنىڭ تىزبەسىنەن وشىرىلەدى جانە باسقا تۇلعالاردىڭ تىركەپ الۋىنا قولجەتىمدى بولادى. ءبىزدىڭ كومنايانىڭ قىزمەتتەرىن پايدالانعانىڭىز ءۇشىن العىس ايتامىز».

جالعان حاتتار mail.ru پوشتا سەرۆەرلەرىنەن جۇرگىزىلگەن. «تولەۋ» دەگەن باتىرمانى باسقاندا ول «ياندەكس. دەنگي» ونلاين تولەم سەرۆيسىنە وتەدى.

KazNIC قازاق جەلىلىك اقپارات ورتالىعىنىڭ جانە قازاقستانداعى حوستينگ كومپانيالاردىڭ وكىلدەرى بۇل اقپاراتتى جوققا شىعاردى. ولاردىڭ ايتۋىنشا، كوپتەگەن قازاقستاندىق كومپانيالار «ياندەكس. دەنگي» تولەم جۇيەسىن اقى الۋ ءۇشىن پايدالانبايدى، سونىمەن قاتار ولار بايلانىسۋ ءۇشىن @gmail.com مەن @mail.ru سەكىلدى تەگىن سەرۆيستەردى قولدانبايدى.

ەگەر دە سىزگە فيشينگ جولداما كەلسە وندا سىلتەمەنى باسىپ، وعان وتپەڭىز، دەپ ەسكەرتەدى ۆەدومستۆوداعىلار.