تۇركى تىلدەس جايدارمان: ءبىرىنشى ورىندى نوعايلاردىڭ «التىن وردا» كومانداسى يەلەندى

نۇر-سۇلتان. قازاقپارات - ەلورداداعى بەيبىتشىلىك پەن كەلىسىم سارايىندا الەمنىڭ تۇركى تىلدەس جاستارىنىڭ اراسىنداعى جايدارمان فەستيۆالى ءوتتى، دەپ حابارلايدى قازاقپارات ءتىلشىسى.

«ءتىلىمىز، ءدىنىمىز ءبىر، ءدىلىمىز ءبىر. ەندى ءازىلىمىز ءبىر بولسىن! بار جاناردى جاۋلاعان «جايدارمان» اشىق!» دەپ باستادى كەشتىڭ جۇرگىزۋشى ەسەن ەلەۋكەن. ونىڭ ايتۋىنشا، جاستار جىلى دەپ جاريالانعان 2019 -جىلى «جايدارماننىڭ» بىرنەشە جوبالارى بار. سونىڭ ءبىرى ءارى بىرەگەيى - حالىقارالىق جايدارمەن فەستيۆالى بولىپ وتىر. ەسەن ەلەۋكەن ءدال وسى كەشتى ۇيىمداستىرۋعا قولداۋ بىلدىرگەن نۇر-سۇلتان قالاسىنىڭ قوعامدىق دامۋ ىستەر باسقارماسىنا العىسىن ءبىلدىردى.

جايدارمان كەشىندە تانىمال ساتيريك كوپەن امىربەك، بەلگىلى تەلەجۇرگىزۋشى يرينا تەن، نۇر-سۇلتان قالاسىنىڭ قوعامدىق دامۋ ىستەر باسقارماسىنىڭ جاستار ءبولىمىنىڭ باسشىسى باقىتجان جۇنىسبەكوۆ، پارلامەنت ءماجىلىسىنىڭ دەپۋتاتى گەننادي شيپوۆسكيح، حالىقارالىق كۆن ويىندارىنىڭ 2017 -جىلعى چەمپيونى دانيار ءجۇمادىلوۆ قازىلىق ەتتى.

 

جايدارمان كەشىندە نۇر سۇلتان قالاسىنان قازاقستان حالقى اسسامبلەياسى كومانداسى، موڭعوليادان كەلگەن «باي ولكە باعلاندارى»، قاراقالپاقستاننان كەلگەن «نۇكىس» كومانداسى، رەسەيدەن باشقۇرتستان، نوعايلاردىڭ «التىن وردا»، تاتارستان كومانداسى، قىرعىزستاندىق «پوزيتيف» پەن قازاقستاندىق بىرنەشە كوماندا باق سىناستى. تۇركى تىلدەس ەلدەردەن كەلگەن اعايىننىڭ اقجارما كوڭىلى، «باي ولكە باعلاندارىنىڭ» ساعىنىشى، اسسامبلەيانىڭ بىرنەشە ۇلتتى بىرىكتىرە ۇيلەستىرگەن ءازىلى، پاۆلوداردىڭ ەكىباستۇز قالاسىنان كەلگەن «ءبىز قازاقپىز» كومانداسىنىڭ جايدارمانعا اكەلگەن جاڭا ستيلى كوپشىلىككە كۇلكى سىيلاپ، ۇتىمدى ازىلدەر ۇزاق قوشەمەتتەرمەن قولداۋ تاپتى.

 

تارتىستى ويىندا ءبىرىنشى ورىندى نوعاي كومانداسى يەلەندى (1 ميلليون تەڭگە). ەكىنشى ورىن قىرعىز رەسپۋبليكاسىنىڭ «پوزيتيف» پەن شىمكەنتتىك «بۇگىن ك ز» كومانداسىنا بۇيىرسا، ءۇشىنشى ورىنعا ءۇش كوماندا موڭعوليالىق «باي ولكە باعىلاندارى» مەن باشقۇرستان، قاراقالپاقستان كوماندالارى تۇراقتادى. كەشتىڭ ۇزدىك ويىنشىسى اتاعى تاتارستان كومانداسىنان نايل سالاحوۆ اتتى ونەرپازعا بۇيىردى.

ەسكە سالا كەتەيىك، تۇركى تىلدەس جاستاردىڭ باسىن بىرىكتەرگەن حالىقارالىق «جايدارمان» ويىندارى العاش رەت 2017 -جىلى وتكىزىلدى. ول كەزدە قازاقستان كوماندالارىمەن بىرگە، شەتەلدىك مەيمانداردىڭ قازاق تىلىندە ونەر كورسەتۋى كورەرمەندەردىڭ زور ىقىلاسىنا يە بولعان. «جايدارمان» ويىنىندا وسكەمەننەن «التاي»، قوستانايدان «ارۋ. ك ز»، ۇيعىر ۇلتىنىڭ «لاعمان. كوم»، باشقۇرتستاننىڭ «ۋفا» قۇراماسى مەن وزبەكستان ك ۆ ن-شىلەرى، قىرعىز رەسپۋبليكاسىنىڭ «پوزيتيۆ»، الماتى وبلىسىنىڭ «جەتىسۋ»، قازاقستاننىڭ نامىسىن قورعاعان «قازاق جىگىتتەرى»، تاتارستاننىڭ «قازان» قۇراماسى مەن وڭتۇستىك قازاقستان قۇراماسى ءوزارا سىنعا تۇسكەن ەدى. باس جۇلدەنى ەكى جىل بۇرىن قىرعىز رەسپۋبليكاسىنىڭ «پوزيتيۆ» قۇراماسى جەڭىپ العان.