وقۋلىق دايىنداۋشىلاردىڭ وزدەرى دايارلىقتان وتەدى

نۇر- سۇلتان.  قازاقپارات - قازاقستاندا مەكتەپ وقۋلىقتارىن دايىنداۋ ءتارتىبى وزگەرۋى مۇمكىن.  وسى جايىندا تولىق اقپارات الۋ ءۇشىن قازاقپارات ءتىلشىسى ءبىلىم جانە عىلىم مينيسترلىگىنە ساۋال جولداعان بولاتىن.

مينيسترلىكتىڭ جاۋابىنا سۇيەنسەك، وقۋلىقتارعا دەگەن تالاپتىڭ وزگەرۋىنە بايلانىستى ونى دايىندايتىن ساراپشىلاردىڭ قۇرامى جاڭارتىلماق.  ساراپشىلار ءتىزىمى باسپا وكىلدەرىنەن قۇپيا ساقتالۋى دا مۇمكىن.

«جاڭا ولشەمدەردى ەسكەرە وتىرىپ، ساراپشىلار بازاسىن جاڭارتۋ جانە ونىڭ قۇپيالىعىن قامتاماسىز ەتۋ بويىنشا جۇمىستار جۇرگىزىلىپ جاتىر.  سونداي- اق، وقۋلىقتاعى قاتەلەرگە مونيتورينگ جۇرگىزىلەدى. كەتكەن قاتەلىك كىتاپتى شىعارعان باسپا ەسەبىنەن جوندەلىپ، قايتا باسىلادى. وسى تۋرالى وقۋلىق دايىنداۋ ەرەجەسىنە وزگەرىستەر ەنگىزىلەدى»، - دەلىنگەن رەسمي مالىمەتتە.

مينيسترلىكتىڭ مالىمەتى بويىنشا، بيىل شىلدە مەن قاراشادا وقۋ ادەبيەتىنىڭ 600 ساراپشىسى، «وقۋلىق» ورتالىعىنىڭ 300 ساراپشىسى، سونداي- اق پاندىك كوميسسيا مۇشەلەرى مەن باستاۋىش ءبىلىم بەرۋ وقۋلىقتارىنىڭ ساراپشىلارى بىلىكتىلىكتى ارتتىرۋ كۋرستارىنان وتەدى. ال 2020-2021 - جىلدارى دۇنيەجۇزىلىك بانك جوباسى اياسىندا وقۋلىقتار ساپاسىن باعالاۋ سالاسىنداعى 1000 ساراپشى ءۇشىن دە وسىنداي كۋرستار ۇيىمداستىرىلماق.

اۆتور: ەسىمجان ناقتىباي