ۇلتتىق قوعامدىق سەنىم كەڭەسىن كىم باسقارۋى كەرەك - دەپۋتات پىكىرى

نۇر-سۇلتان. قازاقپارات - ق ر پارلامەنتى ءماجىلىسىنىڭ دەپۋتاتى پاۆەل كازانسەۆ ۇلتتىق قوعامدىق سەنىم كەڭەسىن باسقارۋ تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«مۇنداعى ۇستەمدىك قوعامدا بولاتىنىنا كامىل سەنىمدىمىن. بىزدەگى ازاماتتىق قوعام ايقىن قالىپتاسقان، ياعني بىزدە پارتيالىق ۇيىمدار، قوعامدىق ۇيىمدار سىندى ديالوگتىق الاڭدار بار. كەڭەس جۇمىسىنىڭ تابىستى بولۋى ءۇشىن حالىقتىڭ بارلىق ماقساتتى توبىنىڭ مۇددەلەرىن ەسكەرۋ ماڭىزدى. سايكەسىنشە، پارتيا وكىلدەرى مىندەتتى تۇردە كەڭەسكە ەنۋى كەرەك، سەبەبى پارتيانىڭ ماقساتتى توبى بار. ال ازاماتتىق اليانس، كاسىپوداق سىندى قوعامدىق بىرلەستىكتەر ەڭبەك ەتەتىن 2 ميلليوننان استام حالىقتى بىرىكتىرىپ وتىر. ءارى قاراي مۇمكىندىگى شەكتەۋلى جاندار، جاستار سىندى وزگە دە الەۋمەتتىك ۇيىمدار كەڭەس جۇمىسىنا قاتىسۋى ءتيىس. سونىمەن بىرگە، مەملەكەتتىك ورگاندار بولماسىن دەگەن پىكىرلەردى ەستىپ ءجۇرمىز. مەملەكەتتىك ورگاندار قاتىسۋى ءتيىس، سەبەبى پىكىرتالاستان ناعىز اقيقات تۋادى»، - دەدى دەپۋتات «قازاقستاننىڭ دامۋ تراەكتورياسى: ساباقتاستىق، ادىلدىك، ورلەۋ» اتتى دوڭگەلەك ۇستەلدە.

سونىمەن بىرگە، پ. كازانسەۆ ۇلتتىق كەڭەستىڭ باسقارۋ فورماسى جونىندە ۇسىنىس ءبىلدىردى.

«شەكتەن شىعاتىن كەرەعار پىكىرلەر دە بار. مەملەكەتتىك اپپاراتتىڭ بەلگىلى ءبىر دەڭگەيدە كونسەرۆاتيۆتى بولۋى زاڭدى. ال شىندىق التىن ارالىقتا جاتىر، ىنتا-ىقىلاس پەن مۇمكىندىكتەرىمىز قازىرگى سىن-قاتەرلەر مەن كەمشىلىكتەرگە جەدەل جاۋاپ قاتقاندا پايدا بولادى. كەزىندە ەلباسى شاعىن جانە ورتا بيزنەستى جىلدام دامىتۋ قاجەت بولعاندا تاپسىرما بەرگەن بولاتىن. 2000 -جىلداردىڭ باسىندا، داعدارىستان شىققان سوڭ، كاسىپكەرلىكتى دامىتۋ بويىنشا ۇلتتىق كوميسسيا قۇرىلدى. وندا قوعام مەن مەملەكەتتىك ورگاندار ۇلەسى 50/50 بولعان. كەز كەلگەن ديالوگ سيفرلاندىرۋعا كەلىپ تىرەلەتىن. قاي نارسەنى جاقسارتۋ قاجەت بولسا، ەڭ الدىمەن سيفرلاندىرۋ كەرەك بولدى. سيفرلاندىرۋ بولماسا، باعدارلامالار قابىلداناتىن. مۇندا دا جەدەل شەشىم قابىلداناتىن جۇمىس فورماسى قاجەت. سوندىقتان ونى بەدەلدى ساياساتكەر باسقارۋى قاجەت. ءتىپتى پرەزيدەنتتىڭ ءوزى باسقارۋى مۇمكىن دەپ ويلايمىن. ارينە، سوڭعى شەشىمدى داۋىس بەرۋ ارقىلى ءبىرىنشى باسشى قابىلدايدى. العاشقى كەزەڭدە ءبىرىنشى باسشى، ەكىنشى كەزەڭدە وكىلەتتى تۇلعا شەشىم قابىلداپ، جۇمىس ىستەيدى. مەنىڭ ويىمشا، وسىنداي فورمات بولۋى قاجەت»، - دەدى پاۆەل.

ايتا كەتەيىك، قازاقستان پرەزيدەنتى قاسىم-جومارت توقايەۆتىڭ جارلىعىمەن ۇلتتىق قوعامدىق سەنىم كەڭەسى قۇرىلعان بولاتىن. ونىڭ قۇرامىنا بارلىق بىرلەستىك وكىلدەرى مەن جاستار ەنەدى. ۇلتتىق قوعامدىق سەنىم كەڭەسىنىڭ العاشقى وتىرىسى وسى جىلدىڭ تامىز ايىندا وتەدى.