ۆلاديمير بوجكو: قازاق ءتىلىن ۇيرەتۋ جۇمىسىن كۇشەيتۋىمىز كەرەك

نۇر-سۇلتان. قازاقپارات - قازاقستان حالقى اسسامبلەيانىڭ جۇمىسىنا قازاق زيالىلارىن، قازاق جاستارىن تارتۋىمىز كەرەك.

پارلامەنت ءماجىلىسىنىڭ ۆيتسە-سپيكەرى ۆلاديمير بوجكو وسىلاي ايتتى، دەپ حابارلايدى قازاقپارات ءتىلشىسى.

«ءبىز اسسامبلەيانىڭ جۇمىسىنا قازاق زيالىلارىن، قازاق جاستارىن تارتۋىمىز كەرەك. بىرلىك پەن كەلىسىمدى تۋ ەتىپ كەلەمىز. قۇراۋشى ۇلت (قازاقتىڭ - اۆت.) ەكەنىن دۇرىس ءتۇسىنىپ وتىرمىز. سوڭعى وقيعالاردى ساراپتاي وتىرىپ، جاستاردى، قازاق زيالىلارىن بەلسەندى تۇردە قازاقستان حالقى اسسامبلەياسىنىڭ جۇمىسىنا جۇمىلدىرۋعا ءتيىسپىز.

«قازاقستاننىڭ 100 جاڭا ەسىمىنە» ەنگەن مىقتى ازاماتتار بارشىلىق. جەتىستىككە جەتكەن ازاماتتاردى اسسامبلەيانىڭ جۇمىسىنا ارالاستىرۋ كەرەك»، - دەدى ول ق ر پرەزيدەنتى ۇلىقتاۋ راسىمىندە ايتىلعان باستامالاردى تالقىلاۋعا ارنالعان ق ح ا كەڭەسىنىڭ وتىرىسىندا.

سونىمەن بىرگە، ۆلاديمير بوجكو قازاق ءتىلىن ۇيرەتۋدى تەرەڭدەتۋ قاجەتتىگىن اتاپ ءوتتى.

«ءبىز قازاق ءتىلىن ۇيرەتۋ جۇمىسىن كۇشەيتۋىمىز كەرەك. اسىرەسە، جاستار اراسىندا. قازاق ءتىلىن بىلەتىن جاستار فلاگمان، ۇلگى بولىپ، وسى باعىتتا جۇمىس جۇرگىزۋىمىز كەرەك. قازاق ءتىلى - مەملەكەتتىك ءتىل. ءبىزدىڭ ءبارىمىز قازاق ءتىلىنىڭ الەۋمەتتىك، ەكونوميكالىق ليفتكە اينالعانىن ءتۇسىنۋىمىز كەرەك»، - دەدى ۆلاديمير بوجكو.

ەسكە سالا كەتسەك، اتالمىش وتىرىستا ق ح ا ءتوراعاسىنىڭ ورىنباسارى جانسەيىت تۇيمەبايەۆ پرەزيدەنت قاسىم-جومارت توقايەۆتىڭ ۇلىقتاۋ راسىمىندە ايتىلعان بايانداماسىنا باعدارلامالىق سيپات بەرىپ، اسسامبلەيا قانداي باعىتتا جۇمىس جۇرگىزەتىنىن ايتقان بولاتىن.