ءوزىمدى بەلسەندى قالا تۇرعىندارىنىڭ قاتارىنا قوسامىن - باقىت سۇلتانوۆ

نۇر-سۇلتان. قازاقپارات - نۇر-سۇلتان قالاسىنىڭ ەكس-اكىمى باقىت سۇلتانوۆ الەۋمەتتىك جەلىدەگى جازباسىندا ەلوردا جۇرتىنا العىس ايتتى، دەپ حابارلايدى قازاقپارات.

«بۇل لاۋازىمدى بوساتىپ، كەزەكتى «شاقىرتۋعا» اتتاناتىن كۇن دە جەتتى. كوزدى اشىپ- جۇمعانشا توعىز اي وتە شىقتى. توعىز ايدا ءسابي دە دۇنيەگە كەلەدى. وسى ۋاقىت ىشىندە ءوزىم 20 جىلدان استام تۇرىپ كەلە جاتقان قالانىڭ شارۋاشىلىعى قانشالىقتى كۇردەلى ەكەنىن، وسىندا ءومىر ءسۇرىپ، جۇمىس ىستەپ جاتقان جانە مۇندا جاقسى ءومىر تابۋعا ۇمتىلعان ادامداردىڭ تاعدىرى مەن ارمانى الۋان ءتۇرلى ەكەنىن ءتۇسىندىم. وسى ايلاردا تۇرعىندارمەن وتە كوپ كەزدەستىم، الدانعان ۇلەسكەرلەر، كوپبالالى انالار، مۇمكىندىگى شەكتەۋلى بالالارى بار وتباسىلاردىڭ ماسەلەلەرىن شەشۋگە تىرىستىم. كوپتەگەن الەۋمەتتىك نىساندار مەن تىرشىلىكپەن قامتاماسىز ەتۋ ۇيىمدارىنا باردىم»، - دەپ جازدى ول Facebook-تەگى پاراقشاسىندا.

ب. سۇلتانوۆتىڭ ايتۋىنشا، ول كوپتەگەن تۇيتكىلدەردىڭ شەشىمى بارلىق دەڭگەيدەگى بيلىكتىڭ جۇمىلا كىرىسۋىنىڭ ناتيجەسىندە مۇمكىن ەكەنىن تۇسىنگەن.

«ءاربىر ءىستى جۇزەگە اسىرۋدى سوزبالاۋ، ارينە بولاشاق ءۇشىن ۇتىمى جوق. سوندىقتان دا مەن جىلدام ءارى بىرەگەي شەشىم قابىلداۋعا تىرىستىم. الايدا، شەشىمدەر ءسىز بەن ءبىزدىڭ ءبارىمىزدىڭ ويىمىزداعىداي نەمەسە دەر كەزىندە بولا قويماعان بولسا كەشىرىم وتىنەمىن.

ءبىراق بالالارىم مەن نەمەرەلەرىم ءوسىپ جاتقان قالاعا دەگەن سەزىمىم كۇشەيە ءتۇستى. قىزمەتىمنىڭ ەرەكشەلىگىنە قاراي وتكەن 20 جىل ىشىندە قالانىڭ ون پايىزىن دا كورمەگەن ەكەنمىن. قالانىڭ شەت-شەتىن ارالاپ، ماسەلەلەردى شەشۋگە ەرەكشە كوڭىل بولگەنىمنەن كەيىن، «اعاشتىڭ جاپىراعىنا قاراپ، ورماندى كورۋ كەرەك، ال ورمانعا قاراپ، ونداعى جاپىراقتى كورە ءبىلۋ قاجەت» دەگەن ەسكى دانالىقتى ەرەكشە ءتۇسىندىم. سوندىقتان قايدا بولسام دا، قانداي لاۋازىمدا بولايىن، مەن ءوزىمنىڭ سۇيىكتى قالامنىڭ ماسەلەلەرىن شەشۋگە جانە قارقىندى دامۋىنا ءارقاشان كومەكتەسۋگە تىرىسامىن. ويتكەنى، ءبىز الەمدىك استانالاردىڭ ءبىرى بولۋىنا ۇمتىلامىز»، - دەدى ول.

سونداي-اق، ب. سۇلتانوۆ قالا تۇرعىندارىنا العىس ايتتى.

«بۇگىننەن باستاپ مەن ءوزىمدى بەلسەندى ءارى «تاجىريبەلى» قالا تۇرعىندارىنىڭ قاتارىنا قوسامىن. مەن ەلوردا باسشىسى قىزمەتىندە بولعان كەزدە ماعان قولداۋ كورەتكەن، الدىما كۇرمەۋلى ماسەلەنى ايتىپ، شەشىمىن تالاپ ەتكەن بارشاڭىزعا زور العىسىمدى بىلدىرەمىن. بۇل مەن ءۇشىن اسقان جاۋاپكەرشىلىككە تولى تاجىريبە بولدى»، - دەدى ول.

ەسكە سالا كەتسەك، كەشە ق ر پرەزيدەنتى قاسىم-جومارت توقايەۆتىڭ جارلىعىمەن التاي كولگىنوۆ نۇر-سۇلتان قالاسىنىڭ اكىمى بولىپ تاعايىندالدى.

 ب. سۇلتانوۆ ەلوردا اكىمدىگىنىڭ باسشىلىعىنا 2018 -جىلدىڭ 11 -شىلدەسى كۇنى كەلگەن بولاتىن.